Silia ma le 900 ‘Amerika ‘ova aso ‘o visa ‘i le tolu tausaga talu ai

‘E nūmera silia tagata ‘Amerika ‘ua ‘ova aso ‘o o lātou visa ‘i totonu ‘o Niu Sila ‘i le tolu tausaga ‘ua tuana’i.  ‘I lona aotelega, ‘e tusa ma le 19,153 tagata ‘ua ova aso ‘i Niu Sila, ‘e tusa ai ma fa’amaumauga ‘a le Matāgaluega ‘o Femalāgāa’iga ‘a Niu Sila.  ‘I le tolu tausaga ‘ua tuana’i, ‘e 6559 tagata na ‘uma le aogā ‘o lātou visa, ‘ae le’i tu’ua lava le atunu’u.

Na fa’aalia ‘e le matāgāluega, ‘o se metotia fou lea na fa’aaogā, na ala ai ‘ona fa’aitīitia le nūmera ‘o tagata ‘ua ‘ova aso, pe ‘ā fua ‘i le fuainūmera ‘o le tausaga talu ai, ‘e 20,979. Na saunoa Steve Watson ‘o le pūlega, ‘ua fa’amaonia ai, ‘o lo’o tūmau pea le la’itiiti ‘o le nūmera ‘o tagata ‘o lo’o ‘ova aso ‘i Niu Sila. 

‘E tasi le miliona visa ‘e fa’agāioi ‘i tausaga ta’itasi ‘e le ‘ōfisa ma le 1.6 miliona ‘o talosaga mō visa ia ‘e ta’ua ‘o le New Zealand Electronic Travel Authority, fa’apea ai ma le 3.6 miliona ‘o tagata ‘e lē ni sitiseni Niu Sila, ‘e taunu’u ‘i le atunu’u.  ‘O le to’atele lava ‘o tagata ‘e malaga mai ‘i Niu Sila ‘e asiasi, gālulue pe ā’o’oga, ‘e usita’ia lava tu’utu’uga ‘o o lātou visa, ma toe malaga ‘ese ‘a’o le’i māe’a le aogā ‘o visa pe toe talosaga fo’i se isi fa’aopoopoga ‘ina ‘ia tūmau ai pea ‘ona nonofo fa’aletūlāfono ‘i totonu ‘o Niu Sila.   

‘O fa’amaumauga pei ‘ona māua, ‘o tagata ‘Amerka na ‘ova aso ‘i Niu Sila talu mai le 2023, ‘e to’a 925.  ‘O le pasene pito telē lava ‘o tagata ‘ova aso pe ‘ā fua ‘i le tele ‘o visa na taliaina, ‘o tagata mai Tonga, ‘e 666.  ‘O Saina, Peretānia tele ma ‘Initia, ‘o lo’o ‘i le lima pito ‘i luga, ‘o atunu’u pito to’atele tagata ‘ova aso ‘i Niu Sila.  ‘I le aotelega ‘o tagata ‘ova aso ‘i le 30 tausaga ‘ua tuana’i, ‘o lo’o taumateina, pe tusa lea ma le to’a 2694 Saina, 2541 mai Tonga, 1981 mai ‘Amerika ma le 1522 mai Initia pei ‘ona līpotia ‘e le Leitiō Niu Sila.

Link to RNZ (Article): https://www.rnz.co.nz/news/community/1389757/more-than-900-americans-have-overstayed-their-visa-in-last-three-years

IMAGE/ATA: RNZ / Quin Tauetau