‘O le a tele ni mū ‘ae laitiiti ‘inisiua

‘A’o fa’aopoopoina ai le fuainūmera ‘o tagata māliliu mai mū mata’utia ‘i Los Angelese ‘i Amerika, ‘ae ‘ua fa’aalia ‘e le ‘au faitōfā ‘o mū tetele, ‘o le suiga ‘o le tau po’o le climate change, ‘o le ‘ā faigōfie ai ‘ona mū nisi vāega ‘o Niu Sila, ma ātili faigatā mō nisi fale ‘ona maua ni ‘inisiua ‘ona ‘o lea tūlaga.

‘O mū ‘uma lava, ‘e iai lava māfua’aga, ‘ae ātili fa’ateteleina ‘ona ‘o savili.  Peita’i, ‘o lo’o fa’aopoopoina ‘e le suiga ‘o le tau ni tūlaga lamatia ‘i nisi ‘o vāega pito vevela ma mātūtū ‘o le atunu’u, ma ‘ua tāua ‘e le ‘au su’esu’e, ‘o pitonu’u ma vāega ‘o Niu Sila nei ‘e aofia ai East Otago fa’apea ma Otago. 

‘I se su’esu’ega na faia ‘i le 2022, ‘e iai vāega ‘o Niu Sila ‘e ono feagai ma ni mū tetele ‘e le’o va’aia ‘i le taimi nei, ma ‘e ono tutusa ai ma tūlaga pei ‘ona va’aia ‘i mū ‘i ‘Ausetālia ‘i le 2019 ma le 2020.

Na fa’aalia ‘i le ‘au fai tōfā ‘i nei matā’upu, ‘e tatau ‘i tagata ‘ona tusi atu ‘iā lātou faipule, ‘ua tatau ‘ona fa’aitīitia kasa ‘o’ona ia ‘o lo’o vevela ai le pāneta ‘ina ‘ia taofia le o’o atu ‘i tūlaga pito sili ‘ona fa’alētonu.  ‘O le tausaga talu ai, sa pito sili ‘ona vevela ‘i le lalolagi ‘e tusa ai ma fa’amaumauga.

‘O lo’o feagai kamupanī ‘inisiua Kalefōnia ma ni talosaga pito sili ‘ona taugatā ‘ona ‘o mū ‘o lo’o a’afia ai ‘i le taimi nei.  Ma i fa’amaumauga ‘i le vāiaso nei, na fa’amauina ai le o’o atu i le 150 piliona tālā le tau ‘o mea ‘ua fa’aleagaina.  ‘Ae to’a 24 ‘i lātou ‘ua maliliu mai ai.

Link to RNZ (Article) translated by Savelina Kasiano: https://www.rnz.co.nz/news/national/538979/wildfire-risk-in-nz-more-flames-less-insurance

ATA: Apu Gomes / Getty Images