Manatu le MFAT ‘ailoga ‘e toe fa’atetele le taua ‘i Iran

‘E ui ‘ina lē mautonu pea le tūlaga ‘e uiga ‘i le taua ‘i Iran ‘aemaise ‘o le faigāmālō ‘a ‘Amerika, ‘e manatu le Matāgāluega ‘o le Vā ‘i Fafo ma Fefa’ataua’iga ‘a Niu Sila, ‘o le ‘ā tatau ‘ona tūmau pea le fa’agāsologa ‘o fefa’ataua’iga ‘o lo’o iai ‘i le taimi nei.

Sa fa’ailoa ‘e le Failautusi Lagolago ‘o le MFAT, le ali’i ‘o Taha Macpherson, ‘o le taimi nei, ‘ua lē ‘alofia le tatau ‘ona tali atu le matāgāluega ‘i fa’alavelave tetele fa’alevāomālō ‘e tūla’i mai, ‘i lea taimi ma lea taimi.

Sā ia tā’ua vevesi fa’alevāomālō ia ‘ua molimauina ‘i totonu ‘o le Pasefika, ‘aemaise le taua ‘i Ukraine, ‘o Gaza, ma le fa’alavelave fa’alenātura lata mai nei ‘i le atunu’u ‘o Nepal.

‘O le fa’alētonu fo’i ua āfāina ai le tau ‘ātoa ma le supply ‘o le suāu’u ma le penisini, pei ‘ona molimauina le ‘āmata mai ‘i ni osofa’iga na taulāmua ai le peresetene ‘o ‘Amerika ma le mālō ‘Isarā’elu ‘i le māsina ‘o Fepuari.

‘Ae ui ‘ina līpotia mai lata mai nei le toe tūla’i mai fo’i ‘o nisi vevesi ‘i le vā ‘o ‘Amerika ma Iran ‘ae talitonu le ali’i ‘o Macpherson, ‘e fōliga mai ‘ua manatu itū ‘e lua ‘o lenei vevesi, ‘e lē tatau ‘ona saga fa’aauauina pea.

Mā ‘ātonu ‘o le agaga ‘o lo’o iai ‘i itū ‘e lua, ‘ia ‘aua ne’i toe o’o lenei taua, ‘i le tūlaga na iai ‘i lona ‘āmataga ‘iā Fepuari.

‘O lo’o fa’aauau pea taumafaiga ‘a mālō ‘e lua ‘o Pakistan ma Oman, ‘ina ‘ia faia ni talanoaga ‘i le vā ‘o itū ‘e lua ‘o lenei taua ‘ina ‘ia mafai ‘ona taofia lenei taua, ‘e ‘auala ‘i feso’ota’iga āloa’ia fa’alevāomālō.

‘O le vāega ‘autū lava ‘o lo’o fe’ese’esea’i ai ma tuai ‘ona maua ai se tonu mautū ‘i le fa’ai’uina ‘o lenei taua, ‘o le pule lea ma le aiā tatau ‘i femalāgā’iga ‘o va’a’oloa ‘i le Vāinu’u ‘o Hormuz.

Link to RNZ (Article): https://www.rnz.co.nz/news/politics/1357677/iran-us-probably-unlikely-to-return-to-full-hostilities-mfat

IMAGE/ATA: MFAT deputy secretary Taha Macpherson. Photo credit: RNZ / Samuel Rillstone