Vaeluaina le ‘au pālota ‘a ‘Amerika ‘i le vā ‘o ali’i ma tama’ita’i

‘I ‘Amerika, ‘o lea toe tasi le vāiaso ‘ātoa ‘o lo’o totoe, ‘ona tāpuni lea ‘o le faigāpālota tele ‘a le Iūnaite Setete, ‘ae ‘ua tūla’i mai le matuā vaeluaina ‘o le ītūpā ‘o ali’i ma tama’ita’i ‘i matā’upu lātou te lagolagoina mai sui tauvā ‘autū mō le tofi peresetene.‘O lenei ‘ese’esega ‘o manatu ma lagona ‘o ītūpā nei ‘e lua, ‘e aliali mai ‘e ono ‘āvea ma ‘autū ‘i le filifiliga po’o Kamala Harris po’o Donald Trump, ‘e manumālō ‘i le tofi peresetene ‘o ‘Amerika.

‘O le taunu’uga ‘o su’esu’ega aupito lata mai nei ‘i lagona ‘o le ‘au pālota ‘ua iloa ai ‘o le 53 pasene ‘o tinā ma tama’ita’i lātou te lagolagoina le tama’ita’i sui peresetene ‘iā Kamala Harris, fa’atusa ‘i le 36 pasene mō le sui tauvā ‘o le Republican.‘O le matā’upu ‘e a’afia ai le aiā tatau ‘ā tinā ma tama’ita’i ‘i le fa’atinoina ‘o ni fa’apa’ū ma’itaga (abortions), ‘e pei ‘o le matā’upu ‘autū lava lea ‘o lo’o fīnauina ‘e le ītūpā ‘o tinā ma tama’ita’i, mā ‘o lo’o iloga fo’i ‘ona mamafa ‘i ai fa’asalalauga ma fa’atōsina ‘a Kamala Harris.

‘E lēai lava fo’i se ‘ese’esega ‘i fuainūmera mō le ītūpā ‘o ali’i lātou te lagolagoina ‘ia Donald Trump, ‘e 53 pasene ‘i le 36 mō Kamala Harris. ‘Ua mātauina ‘i nai māsina ‘ua mavae atu nei, ‘e lua lava matā’upu ‘autū ‘o lo’o laualuga ‘i fa’atōsina ‘a itū ‘e lua, ‘o le vāega lea ‘e a’afia ai le aiā tatau mō le fa’apa’ū pepe (abortion) ma le tūlaga ‘o le tamāo’āiga, ma ‘o ia matā’upu ‘uma ‘e lua, ‘e ‘ese’ese ai lagona ma manatu ‘o le ‘au pālota. ‘Ua leva ‘ona fa’ailoa ‘e Donald Trump, ‘o lona taimi na ‘avea ai ma peresetene sā iloga ‘ona lelei ai ma mālosi le tamāo’āiga ‘o ‘Amerika, mā ‘ā toe tūla’i mai, ‘o le ‘ā ātili ai ‘ona lelei.

Link to RNZ (article) translated by Lauano Ilaoa: https://www.rnz.co.nz/news/us-election-2024/531993/us-election-pollsters-draw-criticism-after-recent-misses

ATA: RNZ