‘Ua ōia le vā nonofo ai ‘o Niu Sila ma Saina

‘O le lē lava ‘o lapata’iga mai ‘iā Saina ‘e uiga ‘i fa’ata’ita’iga ‘e lima ‘a ana fitafita ‘i le sami lea na faia ‘i le ‘ōgasami ‘o le Tasman, ‘o se gāioiga lē manuia ‘i le vā nonofo ai ‘o Niu Sila ma Saina pei ‘ona saunoa ai le Minisitā ‘o le Vā ‘i Fafo, Vaovasamānaia Winston Peters.

Na pito ‘i tele talanoaga ‘i le vā ‘o Vaovasamanaia ma le Minisitā ‘o le Vā ‘i Fafo ‘a Saina, ‘i va’a ‘e tolu ‘a le neivi ‘a Saina ‘i le Tasman Sea, po’o le ‘ōgāsami ‘i le Vasa Pasefika ‘o lo’o ‘i le vā ‘o Niu Sila ma ‘Ausetālia.  Na saunoa Vaovasamanaia, na te le’i taumafai ‘e fesiligia pe sa’ili ni tali mai ‘iā Saina po’o ā ana mea ‘o lo’o faia ‘i lea ‘ōgāsami ‘ona ‘o lo’o iai la lātou aiā ‘i lalo ‘o tūlāfono ‘o ‘ōgāsami ‘e tatau ai ‘ona iai, peita’i, ‘o popōlega ‘i le lē lava ‘o ana lapata’iga po’o fa’asilasilaga ‘aemaise lava ‘i fa’ata’ita’iga ‘a Saina, lea na toe vave sui ai ālāva’a na uia ‘e va’alele la’u pāsese. 

Sā āfea fo’i le matā’upu ‘i le māliliega na sainia ‘i le vā ‘o Le Atu Kuki ma Saina ma sā fa’amanatu ‘e Niu Sila ‘iā Saina, ‘o Le Atu Kuki ‘e mai se vāega ‘o ni atunu’u ‘o lo’o va’aia ‘e Niu Sila, mā ‘e ‘ese mai fo’i le fa’atūlagaga ‘o lona fa’avae mai isi atunu’u ‘o iai ni māliliega ma Saina. 

Muamua atu na saunoa ai Helen Clark, ‘o sē sā ‘avea ma Palemia ‘o Niu Sila, ‘e tatau ‘i le Minisitā ‘o le Vā ‘i Fafo Vaovasamanaia Winston Peters, ‘ona toe fa’amanino le so’otaga ‘a Niu Sila ma le Atu Kuki ‘i fonotaga ma le sui ‘o Saina.

‘O le māliliega lea ‘ua fa’alauiloa fa’alaua’itele, ‘o se ‘ioega ‘i le vā ‘o Rarotonga ma Beijing, ‘ua aofia ai ni folafolaga ‘e inivesi ‘i le ‘blue economy’ mā ‘e ono aofia ai le fa’ataga ‘o le fauga ‘o ni uafu ‘a Saina, ma le iai ‘o ni ana va’a ‘i Le Atu Kuki.  Na tā’ua ‘e Clark lona atugaluga ‘e uiga ‘i le mālililega na faia ‘e Saina ma Le Atu Kuki.  Na ia tā’ua fo’i, na manino lava le iloa ‘e Saina, lana gaioiga ‘ina ‘ua sainia ia māliliega ma Le Atu Kuki. 

‘O isi matā’upu na lāgā, ‘e aofia ai avanoa mō fefa’ataua’iga, ‘o le ono ofi atu ‘o Saina ‘i fa’atalanoaga ‘o fefa’ataua’iga ‘o le CPTPP, ma a’afiaga ‘o le lalolagi mai le faigāmālō ‘a Trump, fa’apea ai Ukraine ma Gaza.

Link to 1News (Article): https://www.rnz.co.nz/news/political/543112/chinese-navy-live-fire-drills-saga-marks-failure-in-china-nz-relationship-peters

ATA: SUPPLIED / RNZ.