Tutū fa’atasi Luxon ma Palemia ‘Ausetālia ma Kānata

‘Ua lagolagoina ‘e le Palemia ‘o Niu Sila ‘iā Christopher Luxon le mana’o ‘o le Palemia ‘o ‘Ausetālia ‘o Anthony Albanese fa’apea le Palemia ‘o Kānata, ‘o Justin Trudeau, ‘i le tatau lea ‘ona fa’a’uma ‘o le taua ‘i Gaza, ma fa’ailoa ai lo lātou ‘ioeina ‘o se fuafuaga ‘a le peresetene ‘Amerika ‘o Joe Biden, mō le taofia ‘o le pāpā ‘o fana ‘i le vā ‘o ‘Isarā’elu ma le Hamas.

‘O se fa’asalalauga tu’ufa’atasi ‘a nei ta’ita’i ‘e to’atolu, na o lātou tā’ua ai le tatau lea ‘ona fa’anatinati ‘ona taofia ‘o le pāpā ‘o fana ‘i le taua lenei ‘i totonu ‘o Gaza, ma le ono fa’atetele ai ‘o fetaua’iga ‘i le vā ‘o fitafita ‘a le Hezbollah lea ‘e lagolagoina mālosi ‘e le mālō Iran, ma le fitafita ‘a ‘Isarāelu,’ i totonu ‘o Lepanona ‘i Saute.

‘Ua fa’aalia ai fa’alaua’itele ‘e ta’ita’i nei ‘e to’atolu, ‘ua o’o ‘i se tūlaga mata’utia mafatiaga ‘o tagata ‘i totonu ‘o Gaza ‘ona ‘o le taua ‘o lo’o iai nei, ma ‘ua alagā tatau ai ‘ona taofia loa ma fa’amuta.

‘O lo’o faitioina mālosi fo’i ‘e ‘i lātou nei, le osofa’iga ‘a le Hamas fa’asaga ‘iā ‘Isarā’elu ‘i le aso 7 ‘o ‘Oketopa ‘o le tausaga talu ai, ma lisiina ai nisi ‘o popōlega ma ātugaluga ‘i le āfāina ‘o aiā tatau ‘a tagata, ‘a’o fa’agāsolo ai lenei taua.

‘O lo’o fa’amamafaina ai ‘e ta’ita’i ‘o Niu Sila, ‘Ausetālia ma Kānata, le tatau lea ‘i le mālō ‘o ‘Isarā’elu, ‘ona fa’autagia lagona ma manatu ‘o isi mālō ‘o le lalolagi, ‘e tusa ai ‘o lenei matā’upu.

ATA: Prime Minister Christopher Luxon and Australia’s Prime Minister Anthony Albanese. RNZ / Angus Dreaver

.