Tōfia ‘e le Tupusā ni Katinale fou se 21 ‘o le ‘Ēkālēsia Katoliko Roma

‘E 21 le aofa’iga ‘o ni Katinale fou ‘ua tōfia ‘e le Fa’aūlūuluga ‘o le ‘Ēkālēsia Katoliko ‘i le lalolagi, ‘o Pope Falanisisi, mā ‘o le ‘ā fa’amautūina o lātou tofiga ‘i se tauaofiaga tele ‘a ta’ita’i ‘o le ‘ēkālēsia ‘e faia ‘i Roma ‘i le aso 8 ‘o Tēsema.

‘O lo’o aofia ai ‘i le 21 na fa’ailoa mai ‘e Pope Falanisisi ‘i le Aso Sā, ‘ia le faife’au ‘e igoa ‘iā Isao Kikuchi mai Iāpani, ‘e 65 tausaga ‘o le soifua, ‘ua to’afitu ‘iā te ia katinale ‘o le ‘ēkālēsia ‘ua filifilia mai Iāpani.

‘O isi atunu’u ‘o lo’o aofia ai ‘o Indonesia, Filipaina fa’apea ma Initia, ‘e lē gata ‘i lea, ‘ae ‘ua tōfia fo’i ‘e ‘avea ma katinale, ‘ia le fa’aūlūuluga ‘o le ‘ēkālēsia Katoliko ‘a Ukraine ma ‘Ēleni ‘i ‘Ausetālia, ‘o Bishop Mykola Bychok, ‘e āmana’ia ai le taua ‘o lo’o faia pea ‘i totonu ‘o Ukraine. ‘O le ‘Aki’ēpikopō lenei ‘o le ‘ēkālēsia Katoliko ‘a Ukraine ma ‘Ēleni ‘i totonu ‘o Melepone, ‘e 44 tausaga ‘o le soifua, ma ‘o ia ‘e aupito talavou ‘i le to’a 21 ‘o katinale fou, ‘e pei ‘ona fa’ailoa mai ‘i Roma.

‘O ‘i lātou ‘ua filifilia ‘e le Tupusā ‘i le tofi katinale, ‘ua si’itia ai le aofa’iga ‘o le vasega ‘o Katinale ‘o le ‘Ēkālēsia aoao, lea ‘e tā’ua ‘o le Kolisi ‘o Katinale  (College of Cardinals), ‘o lātou ia ‘e filifilia le Tupusā po’o le Ta’ita’i Aoao ‘o le ‘Ēkālēsia Katoliko, ‘i le taimi ‘e avanoa ai lea tofiga.

‘O le Kolisi ‘o Katinale, ‘e māsani ā ‘ona to’a 120 le aofa’i, ‘ae mafai lava ‘e le Pope ‘ona faia ‘i ai se fa’asiliga, ‘ina ‘ia mautinoa, ‘o lo’o lelei ma mālosi, ‘a o fa’asolo ‘ina mātutua ona sui ‘āuai.

‘O le 21 ‘ua filifilia nei, ‘o le ‘ā o’o ai ‘i le 142 le aofa’iga ‘ātoa ‘o le Kolisi lenei ‘o Katinale ‘i le lalolagi ‘ātoa.