To’alua tagata faigāluega ma ‘āiga, ‘o le ‘Ōfisa ‘Amepasa ‘a Niu Sila ‘ave’esea mai Tehran

‘E to’alua tagata faigāluega ‘a le ‘ōfisa ‘o le ‘amepasa ‘a Niu Sila fa’apea ma o lā ‘āiga ‘ua ‘ave’esesa mai Tehran.  Na fa’aalia ‘e le Minisitā ‘o le Vā ‘i Fafo Vaovasamanaia Winston Peters na ‘ave’esea ma ‘auina atu ‘i Azerbaijan, ma ‘ua tāpunia lē tūmau ai nei le ‘ōfisa ‘o le ‘amepasa.  ‘E iai le tiute ‘o le mālō ‘o Niu Sila mō le va’aiga ‘o lana ‘aufaigāluega ‘o gālulue ‘i fafo, ‘o le ala lea na faia ai lea fa’ai’uga talafeagai pei ‘ona saunoa le minisitā.

‘Ā fai ‘ae tūla’i mai ni avanoa ‘e fesoasoani ai ‘i le ‘ave’esega ‘o isi tagata Niu Sila ‘i Iran ma ‘Isarā’elu, ‘o le ‘ā fa’atinoina vave loa.  Sa va’ava’ai lelei le mālō ‘i ni ‘auala talafeagai ma le saogalēmū ‘e ‘ave’esea ai tagata Niu Sila mai Iran.  ‘E le’o tatalaina feoa’iga ‘i le ‘ea ma ‘e ono faitau vāiaso, ‘o le māfua’aga lea, ‘e alagātatau ai ‘i so’o se tagata Niu Sila ‘ona faia so’o se gaiōiga ‘e mafai ‘ona ‘ō ‘ese ai mai Iran ‘i le taimi nei, pe ‘ā fai ‘e maua se ‘auala saogalēmū pei ‘ona saunoa Vaovasamanaia.

O lo’o gālulue vāvālalata Niu Sila ma ‘Ausetālia ma talatalanoa ma isi ‘e uiga ‘iā lātou fuafuaga ma fa’apēfea fo’i ‘ona fesoasoani le isi atunu’u ‘i le tasi.  Sa talanoa fo’i le Matāgāluega ‘o le Vā ‘i Fafo ‘i kamupanī va’alele ‘e sa’ili ni fa’amatalaga ‘i ni avanoa mō malaga ‘a va’alele la’u pasese pe ‘ā tatala ālā va’a. 

‘O le taimi nei ‘ua tu’uina atu ai fautuaga ‘a le matāgāluega ‘i tagata Niu Sila ‘ina ‘ia resitala ‘i le tuā’oi mā ‘o le ‘ā fa’aauau pea ‘i nai māsina ‘o lumana’i.  ‘O lo’o iai pea fautuaga mō tagata Niu Sila ‘i ‘Isarā’elu ma Iran ‘ina ‘ia vave ‘ona ō ‘ese pe ‘ā fai latou te silafia ‘ua lē toe saogalēmū ma nonofo ‘i ni lafitaga mo lo lātou puipuiga.  ‘O lo’o iai fo’i le fautuaga mō tagata Niu Sila ‘ina ‘ia ‘aua ne’i malaga ‘i Iran ‘ona ‘o le tūlaga ‘o lo’o iai le taua ‘i le vā ma ‘Isarā’elu ‘i le taimi nei pei ‘ona fa’aalia ‘e Vaovasamanaia.

Link to RNZ (Article) translated: https://www.rnz.co.nz/news/national/564546/two-new-zealand-embassy-staff-families-evacuated-from-tehran

ATA: RNZ / Samuel Rillstone