To’a 16 ‘ua māliliu ‘i le mū ‘i Los Angeles

‘Ua līpotia ‘e fa’apea ‘e o’o mai ‘i le afiafi ananafi taimi Niu Sila, ‘ua o’o atu ‘i le to’a 16 ‘ua māliliu ‘i le mū ‘i Los Angeles ‘i ‘Amerika.  ‘O le mālolosi ‘o savili na vave ai le sosolo ‘a le mū.  Faitau afe tagata ‘ua lēai ni mea ‘e nonofo ai ‘ina ‘ua mū o lātou fale.  Faitau piliona fo’i pili ‘o le ‘ā feagai ma kamupanī ‘inisiua, ‘ae ‘ua folafola ‘e Peresetene Joe Biden le fesoasoani ‘a le mālō tele.

‘E 6 isi afi na mumū solo ‘i vāega ‘o Los Angeles talu mai le Aso Lua mā ‘o lo’o iai le talitonuga, ‘e ono fa’aopoopoina le nūmera ‘o tagata māliliu pe ‘ā o’o atu le ‘au tineimū ‘i fale ta’itasi ia ‘ua fa’atama’ia.  ‘Ua silia ma le 22,000 ‘eka ‘ua mū.  ‘O lapatā’iga ‘a le ‘Ōfisa Vā’aitau, ‘e ātili fa’ateteleina savili ‘o Santa Ana lea ‘o lo’o tapiliina ma vave ai le sosolo ‘a le afi ‘e o’o atu ‘i le pō ‘o le Aso Gafua ma le taeao ‘o le Aso Lua. 

‘O lo’o fa’agāsolo su’esu’ega po’o le ā le māfua’aga ‘o le mū. 

Na toe fo’i nisi ‘o tagata ‘i Altadena ‘e va’ava’ai ‘i o lātou fale po’o iai ni vāega ‘e mafai ‘ona toe fa’aaogā peita’i ‘o le tele lava ‘ua liu efuefu.  ‘O le popōlega ‘o le to’atele ‘i Altadena, ‘ina ne’i fa’amuamua itū ‘e iai tagata mau’oloa ma i’u ‘ina lē ‘āto’atoa tupe ‘e tatau ‘ona tu’uina atu ‘e kamupanī ‘inisiua ‘i tagata ‘e vaivai la lātou fīnau mo a lātou ‘inisiua mō mū.  ‘O lo’o mū ai ma fale ‘o nisi ‘o tagata ‘autū ‘i ata tīfaga.  ‘O se tau aofa’i tau matemate ‘i lenei taimi ‘a le AccuWeather ‘o mea ‘ua fa’aleagaina ‘ua o’o atu i le 135 piliona tālā tupe ‘Amerika ‘e o’o atu lava ‘i le 150 piliona tālā. 

Link to RNZ (Article) translated by Savelina Kasiano: https://www.rnz.co.nz/news/world/538765/death-toll-in-los-angeles-fires-rises-to-16

ATA: Supplied (RNZ).