Ta’u atu ‘e Xi Jinping ‘iā Luxon, ‘e tatau ‘iā Niu Sila ‘ona va’ai ‘iā Saina ‘o se pā’aga, ‘ae lē ‘o se taufa’amata’u

‘E tatau ‘iā Niu Sila ‘ona va’ai ‘iā Saina ‘o se pā’aga, ‘ae lē ‘o se taufa’amata’u, pei ‘ona saunoa ai le ta’ita’i ‘o Saina, Xi Jinping, ‘i le Palemia ‘o Niu Sila, Christopher Luxon ‘i sa lā feiloa’iga fesāga’i ‘e tusa ai ma lipoti ‘a ‘au’aunaga fa’asalalau ‘a le mālō ‘o Saina.  Na fa’aalia ‘e Luxon, ‘e le’i talanoaina fa’apitoa ‘i la lā feiloa’iga, tiute ‘o ‘oloa ia ‘ua folafola ‘e le faigāmālō ‘a Donald Trump, peita’i, ‘o le si’itia ‘o le puipuiga fa’apea ma le tāpenaga ‘o aiaiga tusitusia ‘e fofō ai fa’afitāuli ma fai ai fa’ai’uga, sā mamafa ‘i ai talanoaga.  ‘O le talanoa ‘i ia vāega ‘i se ‘auala fa’a’upufai ‘i le vā ‘o mālō, ‘o se ‘auala ‘e fa’aleo ai atugaluga ‘e uiga ‘i le peresetene filifilia ‘o le Iunāite Setete pei ‘ona saunoa Luxon.  ‘O le ala lea na fa’aalu ai le tele ‘o le taimi ‘o le Palemia ‘o Niu Sila ‘i ona aso ‘e lua ‘i Peru, ‘e fīnau mō tamāo’āiga ‘o atunu’u lāiti, ‘ina ‘ia tutū fa’atasi ‘e mālosi ātili ai. 

‘I le feiloa’iga ‘i le Aso To’ona’i na fa’ailoa atu ai ‘e le ta’ita’i ‘o Saina ‘iā Luxon, atugaluga ‘o lona atunu’u ‘e uiga ‘i le ono ‘āuai ‘o Niu Sila ‘i le Pillar Two ‘o le AUKUS.  Na saunoa Luxon ‘i le ‘au fa’asalalau ‘i le Aso Sā, ‘o lana va’ai ‘i le AUKUS, po’o le fa’atasiga ‘a mālō ‘o ‘Ausetālia, Peretānia ma le Iūnaite Setete, ‘o se tūlaga mautū ma le puipuiga lelei mō ‘Āsia ma Pasefika.

Link to RNZ (Article) translated by Savelina Kasiano: https://www.rnz.co.nz/news/world/534009/xi-jinping-tells-luxon-face-to-face-that-new-zealand-should-see-china-as-a-partner-not-a-threat

ATA: Pool / Chris Skelton.