Talosaga se tama’ita’i fa’asalalau ‘Amerika mō se visa ‘e sau ai ‘i NZ ‘ina ‘ua tē’ena ‘e ‘Ausetālia.

Līpotia mai le fa’aulu ‘o le talosaga mō se visa ‘e ulufale mai ai ‘i Niu Sila, ‘ia se tama’ita’i fa’asalalau ‘Amerika ‘e tele ‘ina vevesi ai tagata ‘i ana fa’asalalauga.  ‘O lenei māfine ‘e suafa ‘iā Candace Owens, ‘o lo’o fia malaga mai ‘i Niu Sila ‘i le māsina fou mō ni ana polokalame, ‘o lo’o fia fa’atinoina ai.‘O lenei tama’ita’i ‘e tusa ma le 18-miliona le aofa’iga ‘o tagata ‘e mulimuli ai ‘i ana polokalame ‘i luga ‘o feso’ota’iga televavave po’o le social media, ma ‘o se tasi ‘ua tele taimi ‘ua ia faia ai ni fa’asalalauga talitonuga gatā, ‘e aofia ai ma sana fa’a’upuga ‘e fa’apea, ‘e lē moni le fasiotia ‘o le faitau miliona ‘o tagata ‘Isarā’elu ‘e Hitilā ma ana vaegā’au, ‘i le fa’alavelave mata’utia lea ‘e fa’aigoaina ‘o le holocaust.

‘O loo fa’atūlaga ‘e faia sana tautalaga fa’alaua’itele ‘i ‘Aukilani ‘iā Nōvema, ‘ā ‘uma ‘ona malaga ai lea ‘i ‘Ausetālia, peita’i lā, ‘o lea ‘ua tē’ena ‘e le Mālō ‘Ausetālia lana talosaga mō se visa ‘e ulufale atu ai.Na fa’ailoa mai ‘e le Minisitā ‘o Matā’upu fa’alōtoifale ‘a ‘Ausetālia, ‘o Tony Burke, ‘e lē manuia le āmio ‘a lenei tama’itai fa’asalalau ma ona uiga fa’aalia ‘e mafai ai ‘ona tūla’i mai ni vevesi ma nisi tūlaga lē manuia ‘i vāega ‘ese’ese ‘o tagata ‘e ono fa’alogo ‘i ai ‘i ana fa’a’upuga. Na fa’amaonia mai ananafi ‘e le ‘Ōfisa ‘o Femalāgā’iga ‘a Niu Sila, ‘ua lātou maua le talosaga mō se visa ulufale ‘o lenei tama’ita’i, ma ‘o lo’o fa’agāsolo nei ‘i ai su’esu’ega ma iloiloga  māsani ‘a le matāgāluega.

Link to RNZ (article) translated by Lauano Ilaoa: https://www.rnz.co.nz/news/national/532061/nz-visa-request-made-for-divisive-us-broadcaster-candace-owens

ATA: AFP/ Getty Images – Jason Davies – Immigration New Zealand is assessing a visa application from controversial right-wing broadcaster Candace Owens.