Silia ‘i le 200 ‘ua maliliu ‘i lōloga ‘i Sēpānia

‘Ua sili atu ‘i le 211 le aofa’iga ‘o tagata ‘ua mautinoa ‘ua maliliu ‘i le lōloga mata’utia ‘ua a’afia ai le atunu’u ‘o Sēpania, ma le to’atele ‘o isi ‘o lo’o leiloa ‘e le’i maua ‘i le tuana’i ai ‘o aso soso’o ‘e fā ‘o tīmuga mamafa na a’afia ai le talafātai ‘i sasa’e ‘o lea atunu’u.

Na fa’ailoa ‘e le palemia ‘iā Pedro Sanchez, ‘e 5000 le aofa’i ‘o isi fitafita ‘ua ‘auina atu ‘i le itūmālō ‘o Valencia, lea ‘o lo’o aupito ‘i pagātia ‘i nei lōloga, mō gāluega fesoasoani ma gāluega lave’ai, ‘o le ‘ā fa’aopoopo atu ‘i lātou nei, ‘i isi fitafita ‘e 2,500 ‘ua iai nei ‘i ia vāega ‘o Spain.

‘Ua fa’amatalaina lōloga nei, ‘o ni tāfega ma ni lōloga aupito mātuiā ‘ua a’afia ai Sēpania ‘i lona tala fa’asolopito, ‘e lē gata ‘ina to’atele ‘ua maliliu ai, ‘ae matuā tele ma anoanoa’i mea ‘ua fa’aleagaina ai ‘e aofia ai fale ‘o ‘āiga ‘aemaise ‘o fa’ato’aga ma isi mea tōtino ‘e aofia ai meāfale ma ta’avale, ‘aemaise ‘o ‘auala ma isi mea aogā ‘a le mālō.

 Link to RNZ (article) translated by Savelina Kasiano:https:https://www.rnz.co.nz/news/world/532680/spain-mounts-biggest-peacetime-disaster-recovery-operation-as-death-toll-reaches-211

Ata: AFP / Jose Jordan