Saunoaga ‘a Joe Biden

“Ua tatau ‘i tagata ‘o ‘Amerika ‘ona toe la’a tasi ‘i tua, ‘ina ‘ia fuafua lelei ai pē fa’apēfea ‘ona o tātou āga’i ‘i luma”, ‘o se vāega lea ‘o le saunoaga āloa’ia ‘a le ali’i peresetene ‘o Joe Biden mai le Fale Pa’epa’e anapō, ‘e tusa ai ‘o le taumafaiga ‘e tagatavaleina le ali’i sā ‘avea muamua ma peresetene ‘iā Donald Trump.

Sa fa’aalia ai ‘e Biden, ‘e lē tatau ‘ona talia gōfie ‘e tagata ‘Amerika lenei itū’āiga ‘o uiga mata’utia ‘e saga fa’aauau pea.  Na ia tā’ua foi’, ‘o le taimi nei ‘ua matuā vevela ma vevesi fa’a’upuga ma lafoga ‘e a’afia ai matā’upu tau ‘upufai’omālō ‘i totonu ‘o le atunu’u, ma ‘ua tatau ‘ona fa’aitīitia ia tūlaga.

“ ‘o le tiute fai ‘o tātou ‘uma le fa’atino ‘o lea tūlaga,” saunoa ai le ali’i peresetene.

Sā ia fa’amamafaina fo’i, ‘o ‘Amerika, ‘o le pusa pālota ‘e tali ai ona fa’afītāuli ma ‘ese’esega ‘o manatu, ‘ae lē ‘o le pulufana.

Mā ‘o le mālosi’aga sili ‘e suia ai le pule ‘i totonu ‘o le Iunaite Setete ‘o ‘Amerika, ‘e iai lea ‘i lima ‘o ona tagata, ‘ae lē ‘o lima ‘o se tagata ‘e taupulepule ‘e tagatavaleina se isi tagata.

‘O lona tolu ai lea ‘o taimi ‘ua faia ai ni saunoaga ‘a le ali’i peresetene ‘o Joe Biden talu ‘ona tūla’i mai lenei fa’alavelave ‘i le Aso To’anai ‘ua mavae, taimi ‘Amerika.

‘O lenei fa’alavelave, ‘e lē ‘o āfāina ai fuafuaga ‘a le pātī ‘a le Reublicans mō la lātou tauaofiaga tele, ‘i Milwaukee ‘i le asō.  ‘O lea fa’atasiga ‘o le ‘ā āloa’ia ai ‘ona filifilia le ali’i ‘o Donald Trump ma sui tauvā ‘o lea pātī mō le pālota ‘o le tofi peresetene, ‘o le ‘ā fa’ailoa ai fo’i ‘i le asō ‘e Trump le igoa ‘o le tagata ‘o le ‘ā ‘āvea ma ana paga ‘e tamo’e mō le tofi sui peresetene, ‘i le pālota tele ‘iā Nōvema.

ATA: CNN.