Saogalēmū Donald Trump ‘ae to’alua ‘ua māliliu

‘O lo’o saogalēmū le ali’i ‘o Donald Trump, ‘ae to’alua tagata ‘ua māliliu ‘i le fa’alavelave lea na pāpā ai uafana ‘a’o fa’agāsolo se fa’atasiga fa’atōsina ‘a le sui ‘o le pātī ‘a Republican ‘i le nu’u ‘o Butler ‘i Pennsylvania ‘i le Aso Sā ananafi.

‘O se fa’aaliga āloa’ia mai le vāega su’esu’e ‘a le FBI, na tā’ua ai, ‘o le to’alua na māliliu ‘i lenei fa’alavelave, ‘e aofia ai ma le taule’ale’a ‘e igoa iā Thomas Mathews Crooks, 20 tausaga le matua, ‘e fa’apea ‘o ia lea sā taumafai ‘e tagatavaleina le ali’i ‘o Donlad Trump.

Na fa’ailoa mai ‘e le FBI, ‘o lenei taule’ale’a ‘o se talavou ‘e nofo ai ‘i le pitonu’u ‘o Bethel ‘i Buter ‘i Pennsylvania…..’o ia ‘o se tasi ‘e le’i leva nei ‘ona lesitala ‘e pālota ‘i faigā pālota ‘a ‘Amerika…mā ‘o se sui ‘o le pātī ‘a le Republican.

‘O lo’o gālulue ai nei le FBI, ‘e su’esu’e le pogai ‘o lona taumafai ‘e tagatavaleina le ali’i ‘o Donald Trump.

 ‘E to’alua isi tagata na mānunu’a tigaina ai ‘i lenei fa’alavelave.

 ‘E pei ‘ona silasila ‘i ai ‘i līpoti ma fa’asalalauga mai ‘Amerika, ‘o lenei osofa’iga sā fa’amanu’alia ai Trump ‘i le pito ‘i luga ‘o le taliga, ma sā vave ‘ona ‘ave’esea mai ‘o ia ‘e leoleo nanā ‘o le puipuiga mai le mea sā faia ai lana tautalaga, ‘ae ‘auina atu ‘i le falema’i mō togafitiga.

‘O le taimi nei ‘e tele ni su’esu’ega ‘ua fa’agāsolo, ‘e tusa ‘o lenei fa’alavelave, ma ‘ua māe’a fo’i ‘ona fofogaina le ali’i perestene ‘iā Joe Biden ‘e le vāega ‘o le puipuiga ‘a le mālō ‘Amerika.

‘I lenei taimi ‘o le vevesi ‘o manatu ma lagona ‘o tagata ‘i totonu ‘o ‘Amerika ‘ona ‘o matā’upu tau ‘upufaiomālō, ‘o le tūla’i mai ‘o se taumafaiga ‘e tagatavaleina ai le ali’i ‘o Donald Trump, ‘ua matuā iloga ‘ona lē fiafia ai ma matamata ita tagata pālota ‘e lagolagoina le pātī ‘a le Republican, ma ‘ua taofia ai fa’atōsina ‘a le pātī ‘a le Democrats, ma tūla’i mai ai popōlega, ‘i le ono tele ‘o nisi fa’alavelave ‘e māliliu ai tagata, ‘a’o lumana’i ai le pālota mō le tofi peresetene ‘o le Iūnaite Setete ‘iā Novema.

ATA: The Week (theweek.in)