Pomu ‘e ‘Amerika Iran

‘O lea ‘ua fa’aālia ‘e le Peresetene ‘Amerika ‘o Donald Trump, ‘ua tatau nei ‘i le Mālō Iran, ‘ona faia taumafaiga mō se filemu ‘i le vā ma ‘Isarā’elu, ‘auā ‘a leai, ‘o le ‘a toe faia nisi osofa’iga ‘a le Iunaite Setete, mō le fa’atama’ia ‘o ona nofoāga ‘uma ‘o le mālosi fa’a-niukilia.

‘E pei ‘ona silasila ma molimauina ‘i fa’asalalauga mai fafo, ‘o le Aso Sā ‘ananafi lea na pomu ai ‘e va’aleletau ‘o le mālō ‘Amerika, ia nofoāga ‘e fa’apitoa ‘i le fa’amālosia ai ‘o le paoa niukilia ‘a le mālō Iran.

‘O le saunoaga aloā’ia ‘i le televise, ‘a le ali’i Peresetene ‘o Donald  Trump ‘i le mā’ea ai ‘o ia osofa’iga ‘ananafi, na ia tā’ua ai, ‘e tatau ‘ona maua loa le filemu ma fa’a’uma le taua, ‘a leai ‘o le ‘a feagai loa Iran ma ni puapuaga mata’utia ‘e le’i o’o iai ‘i totonu ‘o le vaiaso lea ‘ua tuana’i atu nei, talu ‘ona fetaua’i ma le mālō ‘Isarā’elu.

Sa fa’ailoa fo’i ‘e Trump, ‘e tele isi nofoaga ‘e mafai ‘ona osofa’ia ‘e va’aleletau ‘o le Iunaite Setete ‘i totonu ‘o Iran ma ‘afai ‘e lē vave maua se filemu, ‘o le ‘a aga’i loa le mālō ‘Amerika ‘e osofa’ia ia nofoaga ‘uma.

Sa fa’amanino fo’i ‘i lea saunoaga ‘a Trump, ‘o osofa’iga nei ‘a ‘Amerika fa’asaga ‘iā Iran, ‘ona pau lea ‘o le tūlaga ‘o lo’o mana’o iai, ‘ina ‘ia fa’aleagaina nofoaga ‘e gaosi ai le mālosi’aga fa’aniukilia ‘ae lē ‘o iai se fa’amoemoe ‘o ‘Amerika ‘e osofa’ia ma suia ai le faigāmālō ‘a le atunu’u ‘o Iran.

‘O nofoaga ‘autū ‘e tolu ‘o meatau niukilia ‘a Iran ia na osofa’ia ‘e ‘Amerika ‘ananafi, ‘e aofia ai le nofoaga ‘e ta’ua ‘o le Natanz, fa’apea le Isfahan ma le Fordow na ta’ua ‘e Donald Trump, ‘e 6 le aofa’i ‘o ni pomu mālolosi  ‘e ta’ua ‘o bunker-buster bombs na tafanaina ai le nofoaga lea ‘i Fordow, ‘ae 30 le aofa’i ‘o isi pulu fa’atonutonu ‘o le ituaiga ‘o le Tomahawk missiles na fa’aaogāina ‘e osofa’ia ai isi nofoaga ‘e lua ia na a’afia.

‘O va’alele ‘o le ituaiga ‘o le B-2 bombers ‘ia sa fa’aaogāina ‘e fa’atino ai ia osofa’iga ‘a le mālō ‘Amerika. Sa vāi’ia ai ma fa’afetaia ‘e le pālemia ‘Isarā’elu, ‘o Benjamin Netanyahu ia le ali’i peresetene ‘o Donald Trump ‘o ‘Amerika ‘ina ‘ua faia lenei osofa’iga.

Na ta’ua ai ‘e Benjamin Netanyahu, ‘o le ‘a fa’amauina ‘i le talafa’asolopito, ‘o le fa’ai’uga ‘a Donald Trump ‘ua suia ai le talafa’asolopito ‘o le lalolagi ‘e ‘auala ‘i le fa’aleagaina ‘o le mālosi fa’a-niukilia ‘o le mālā ‘o Iran.

ATA: The White House.