Pāpā leitiō fa’auaeālesi ‘a le Hezbollah ‘i Lepanona

‘O le Aso Tofi na pomu ai ‘e ‘Isarā’elu le itū ‘i saute ‘o Lepanona ma la lātou fa’amatalaga, ‘ua ‘o lātou fa’alavelave ‘e tāofi se fuafuaga ‘o lagolagoina ‘e Iran.  Na pāpā ni leitiō po’o uālesi fe’avea’i (hand-held radios) na fa’aaogāina ‘e le vāega ‘a le Hezbollah ‘i Lepanona ‘i le itū ‘i Saute fa’atasi ai ma ni pitonu’u ‘o Beirut, ma ‘ua fa’atuputeleina ai le feitaga’i ma ‘Isarā’elu, talu mai le taimi na pāpā ai pagers po’o nisi masini fa’apea ‘e fa’aaogā ‘e fa’ailoa atu ai ni fe’au.  Na fa’aalia ‘e le matāgāluega ‘o le soifua mālōlōina ‘a Lepanona, ‘e to’a 14 tagata na māliliu ai, ma le silia ma le 300 na mānunu’a, ‘ae ‘e to’a 12 ‘ua o’o atu ‘i ai le fuainūmera ‘o tagata na māliliu ‘i pagers ia na pāpā ‘i le Aso Lua, ‘e aofia ai tamaiti ma le lata ‘i le to’a 3000 na mānunu’a.

‘O masini mō uaeālesi ia na pāpā ‘i le Aso Lulu, na tupu ‘i tafatafa ‘o se falelauasiga na fa’atūlagaina ‘e le Hezbollah lea ‘e lagolagoina ‘e Iran, mō ‘i lātou na māliliu ‘i le Aso Lua, ‘ina ‘ua pāpā le faitau afe ‘o pagers ‘e fa’aaogāina ‘e le Hezbollah ‘i le atunu’u ma sā mānunu’a ai le to’atele ‘o a lātou ‘au tau.  Na fa’aalia e le Hezbollah, na faia la lātou osofa’iga ‘i vāega ‘o iai meatau ‘a ‘Isarā’elu.  ‘Ua mata’itūina ‘e le lalolagi ma taumate le ono telē ‘o se taua ‘e tupu i Sasa’e Tūtotonu.

Na su’esu’eina ‘e le Reuters ni ata ‘o walkie-talkies po’o leitiō ia ‘e fe’avea’i ‘e pei ni telefoni ‘e u’u lava ‘i le lima, ma sā iloa ai se vāega ‘e fa’aigoaina ‘o le ICOM na gaosi ‘i Iāpani.  Na tā’ua ‘e le kamupanī, ‘ua tāofia le toe gaosia ‘o itū’āiga ‘ese’ese ‘o leitiō po’o masini nei ‘o le itū’āiga ‘o le ICOM ‘e aofia ai le IC-V82, lea ‘e fōliga mai ‘e tai tutusa lava ma ata ‘o masini mai Lepanona ‘i le Aso Lulu ma sa lē toe gaosiaina talu mai le 2014.  Na fa’atau ‘e le Hezbollah ia leitiō fe’avea’i mō feso’ota’iga (hand-held radios) ‘i le lima māsina talu ai, ‘i le taimi na fa’atauina ai fo’i pagers ‘e tusa ai ma se līpoti ‘a le Reuters.  ‘O le fa’amatalaga ‘a se tagata sīnia ‘i Lepanona mō le puipuiga ‘e tusa ai ma līpoti ‘a le Reuters, ‘o le vāega fa’asipai ‘a ‘Isarā’elu ‘o le Mossad, lea ‘ua iloga ‘i tala fa’asolopito ‘i le atamamai ‘i gāioiga fa’asipai ‘i isi atunu’u, na tu’uina ni pomu po’o ni mea fa’apāpā ‘i totonu ‘o pagers na fa’atau ‘e le Hezbollah ‘i māsina ‘ua tuana’i a’o le’i tupu le osofa’iga ‘i le Aso Lua.  ‘E le’o tali ‘Isarā’elu ‘i lea tu’ua’iga.

Link to RNZ (Article) translated by Savelina Kasiano: https://www.rnz.co.nz/news/world/528380/hezbollah-hand-held-radios-detonate-across-lebanon-sources-say

ATA: Firefighters put out flames at the scene of a reported device explosion in Saida in southern Lebanon on 18 September 2024 / AFP (RNZ).