Manumālō Donald Trump, fa’amālō ‘iai Luxon ma Vaovasamānaia

‘I se saunoaga ‘a Donald Trump ‘i Florida, na ia folafola ai lona manumālō, ‘a’o faitauina pea pālota ‘i nisi ‘o setete ia ‘e tele ‘ina mālosi ai le lagolago mō vāega fa’a’upufai tetele ‘e lua ma ‘o setete tāua ‘i faigā filifiliga mō se peresetene.  ‘E 270 palota ‘e tatau ‘ona ‘ausia ‘e se sui ‘ina ‘ia mafai ‘ona manumālō ai.  ‘Ua toe mālō fo’i le Republicans ‘i le Senate.

‘Ua ‘aufa’atasi le Palemia ‘o Niu Sila Christopher Luxon fa’apea le sui Palemia Vaovasamanaia Winston Peters, ma ta’ita’i ‘o isi mālō ‘o le lalolagi, ‘e fa’aleo a lātou fa’amālō ‘i le sui o le Republicans, Donald Trump ‘ina ‘ua i’u le faigāpālota tele ‘a le Iūnaite Setete ‘o ‘Amerika ma ‘ua manumālō ma sili atu ana pālota nai lō le sui tauvā ‘a le Democrats Kamala Harris, lē ‘o lo’o ‘avea nei ma sui peresetene.  Na tūsia ‘e Luxon ‘i luga ‘o le X, ‘o le Iūnaite Setete, ‘o se tasi ‘o pā’aga pito tāua ‘a Niu Sila.  Ma ‘ua fa’aleo atu ai lana fa’amālō ‘iā Donald Trump le peresetene filifilia, ma ‘ua sauni ‘e fa’aauau ‘ona fau le so’otaga ‘a Niu Sila ma le faigāmālō fou ‘a le Iūnaite Setete.

Na tūsia fo’i ‘e Vaovasamanaia ‘i luga ‘o le ‘upega ‘o feso’ota’iga ‘o le X, ‘e fa’apea, ‘o lea ‘ua fa’aali finagalo ‘o tagata ‘o ‘Amerika, ma ‘ua tāpena ma le fiafia Niu Sila, ‘e gālulue ma lo lātou peresetene fou ma le sui peresetene.

‘O nisi ‘o ta’ita’i ‘o le lalolagi na vave fa’ao’o atu a lātou fa’amālō, ‘e iai le palemia ‘o ‘Isarā’elu, Benjamin Netanyahu, Peresetene ‘o Falani, Emmanuel Macron, Minisitā ‘o le Puipuiga ‘a ‘Isarā’elu, Itamar Ben-gvir, fa’apea se tasi na ‘avea ma Peresetene ‘o le Mālō ‘o Lusia, Dmitry Medvedev.

Link to RNZ (Article) translated by Savelina Kasiano: https://www.rnz.co.nz/news/world/533043/donald-trump-speaks-in-florida-we-made-history-tonight

ATA: AFP / Jim Watson