Mānana’o tagata ‘Isarā’elu ‘e saini Netanyahu ‘i se maliega ma le Hamas ‘e fa’asa’oloto ai tagata ‘o lo’o taofia pea ‘i Gaza

‘E faitau afe tagata ‘Isarā’elu sā ‘āuai ‘i solo tete’e ‘i le ‘a’ai ‘o Tel Aviv ma o lātou fa’aalia ai, ‘ua tatau ‘i le palemia ‘iā Benjamin Netanyahu, ‘ona saini loa se feagaiga ‘i le vā ma le Hamas, ‘ina ‘ia fa’asa’oloto mai ai tagata ia ‘o lo’o taofia pea ‘e le Hamas ‘i totonu ‘o Gaza, talu mai le tausaga ‘ua mavae.‘O le to’atele ‘o tagata sā ‘āuai ‘i nei tete’e, ‘o mātua ma ‘āiga ‘o tagata ‘Isarā’elu nei na ave fa’amālosi ‘e le Hamas ma māfua ai le taua ‘o lo’o faia nei ‘i Gaza.

Sā fa’ailoa ‘e ‘i lātou nei ‘i le taimi ‘o le solo tete’e ‘i le Aso Sā, ‘ua ‘uma le taimi ‘o talanoaga  ‘ae ‘ua tatau nei loa ‘ona faia se fa’ai’uga ‘e fa’afo’i mai ai tagata nei ‘i o lātou ‘āiga.‘E talu ‘ona ‘āmata le taua lenei ‘iā ‘Oketopa ‘o le tausaga ‘ua mavae, ‘e na’o le to’a 17 le aofa’iga ‘o tagata ‘Isarā’elu na ‘ave fa’amālosi ‘e le Hamas ‘ua fa’afo’i ane ‘i lo lātou atunu’u, ‘i se fesuia’iga sā faia ‘iā Nōvema ‘o le tausaga talu ai, lea na fa’asa’oloto ai ‘e ‘Isarā’elu tagata Pālesitina ‘e to’a 39 sā taofia ‘i ona  falepuipui.

‘Ae talu ‘ona fasiotia le ta’ita’i ‘o le Hamas ‘e igoa ‘iā Yahya Sinwar, lea ‘e fa’apea sā ‘autū ‘i ai le fuafuaga ‘o le osofa’iga ‘a le Hamas fa’asaga ‘iā ‘Isarā’elu ‘i le tausaga talu ai, ‘o lea ‘ua taufai fa’ailoa mai ‘e le mālō ‘Isarā’elu fa’apea ai ma le Hamas, ‘e lē tatau lā ‘ona fa’a’uma lenei taua ‘ae ‘ia fa’aauau pea.

Link to RNZ (article) translated by Lauano Ilaoa: https://www.rnz.co.nz/news/world/531363/israel-s-military-says-it-attacked-hezbollah-s-intelligence-hq-in-beirut

Ata: Cross-border fighting between Israel and Hezbollah has been ongoing for the past year – ETIENNE TORBEY / AFP