Maliu Bianca Jones 19 tausaga mai le taumafaina ‘o mea inu ‘e iai le methanol ‘i Laos

Na vave ona fa’amuta fiafiaga ma tāfaoga ‘a tama’ita’i talavou ‘e to’alua mai Melepone ‘i ‘Ausetālia, na tāfafao ‘i Laos, ina ‘ua masalomia ‘ua taumafaina se vaiinu ‘o filogia ma le vailā’au ‘o le methanol, ma maliu ai le isi talavou ‘iā Bianca Jones. Na saunoa le palemia ‘o ‘Ausetālia Anthony Albanese, ‘o se tala fa’anoanoa tele lea mō ‘Ausetālia. Na momoli ana fa’amaisega ‘i ‘āiga ma uō ‘o lē ‘ua maliu. ‘O Jones 19 tausaga le matua, na fai malaga ‘i Laos ma lana uō iā Holly Bowles, na mama’i ina ‘ua mā’ea se lā tāfaoga ‘i Vang Vieng ‘i le vaiaso talu ai. Na ‘auina atu ‘i lā’ua ‘i falema’i ‘ese’ese ‘i Thailand, ma o lo’o iai ‘i se tūlaga tigaina Bowles, 19 fo’i tausaga le matua. ‘E to’afā isi tagata ‘ua māliliu ‘i le fa’alavelave lava e tasi, ‘o lo’o masalomia na inuina ni vaiinu filogia ma le methanol. ‘E le itiiti ifo ma le to’asefulu isi tagata ‘o lo’o mama’i tīgāina mai le taumafaina ‘o mea inu ‘e fefiloi ma le methanol. Na fa’amāonia mai ‘e le Matāgāluega ‘o le Vā i Fafo ‘a Denmark. ‘E to’alua ona tagatānu’u, 19 ma le 20 tausaga le mātutua, ‘ua māliliu mai ‘i le vailā’au lava ‘e tasi. ‘O lo’o toe fautuaina mātua, ‘ia fa’amanatu ‘i fānau talavou, tautuanā le saogalēmū pe ‘ā ō e tāfafao ‘i nofoaga pei o pā pia ma isi, ona ‘ua si’itia nūmera ‘o tagata ‘e māliliu pe ‘ā fa’a’ōnā pē tu’u e tagata mea o’ona ‘i totonu o mea inu.  

Link to RNZ (Article) translated by Anna Fa’asolo: https://www.rnz.co.nz/news/world/534459/melbourne-teenager-bianca-jones-dies-after-suspected-laos-methanol-poisoning

ATA: Bianca Jones and a friend became critically ill after consuming drinks suspected to have been tainted by methanol at a bar in Vang Vieng. Photo: Facebook (RNZ).