Lē fiafia tagata Puerto Rico iā Donald Trump

‘I le toe aso lenei ‘a’o lumana’i ai le pālota ‘a le Iūnaite Setete, ‘ua līpotia mai ‘i le setete ‘o Philadelphia, le matuā lē fiafia ‘o le to’atele ‘o tagata Puerto Rico ‘e nonofo ai ‘i lea setete ‘i ni lafoga na faia ‘i le vāiaso na te’a nei ‘e se tagata fai mea mālie ‘i le taimi ‘o se fa’atasiga mō Donald Trump, lea na ia tā’ua ai ‘e fa’apea ‘o atu motu ‘o Puerto Rico ‘o se fa’atāfunaga po’o se lāpisi. ‘Ua ‘avea lea ma mea ‘ua fuli ai tagata Puerto Rico ‘i lea setete ‘e ‘ūna’i ma fautuaina ō lātou tagata, ‘ina ‘ia āga’i ‘e pālota.

‘E manatu le ‘au tusitala, ‘e ono telē se āfāina ai ‘o Donald Trump ‘i lea tulaga ‘ona ‘o le setete lenei ‘o Pennsylvania ‘o sē tasi ‘o setete ‘e fitu ia ‘e tā’ua ‘o swing states, ‘e fesuisuia’i le pāti lātou te lagolagoina ‘i taimi ‘o faigā pālota ‘a ‘Amerika. ‘Ae ‘o Pennsylvania ‘e nonofo ai le tusa ‘o le ‘afa miliona ‘o tagata ‘e tupuga mai ‘i le atunu’u lenei ‘o Puerto Rico. ‘O nei atu motu pei ona silafia, ‘o se teritori ‘o le Iūnaite Setete, ‘ae lē ‘o se setete, ‘ae ‘o tagata Puerto Rico ‘uma ‘e nonofo ‘i totonu ‘o ‘Amerika ‘o sitiseni ‘o le Iūnaite Setete ma ‘e āgava’a ‘e pālota ‘i faigā pālota.

‘E tele ni solo tete’e ‘ua faia ‘i ītū ‘ese’ese ‘o Pennsylvania ‘e tagata Puerto Rico, ‘e fa’aalia ai lō lātou lē fiafia ‘i fa’a’upuga pei ona faia ‘e le ali’i fai mea mālie ‘o Tony Hinchcliffe ‘i le taimi ‘o se fa’atasiga tele ‘a Donald Trump ‘e fa’atōsina ai le ‘au pālota. ‘O le taimi nei, ‘ua fa’aalia ‘e Donald Trump, ‘o ia na te lē silafia le ali’i fai mea mālie lenei ‘o Tony Hinchcliffe.

Link to RNZ (article) translated by Lauano Ilaoa: https://www.rnz.co.nz/news/world/532828/puerto-ricans-fired-up-to-punish-trump-at-the-ballot-box

Ata: RNZ / Nick Monro