Lavea militeli ‘a ‘Ausetālia ‘i Sasa’e Tūtotonu ‘i se drone ‘a Iran

Na fa’aalia ‘e ‘Ausetālia ‘i le Aso Lua, na lavea pe na a’afia le nofoaga ‘autū ‘a la lātou militeli ‘i Sasa’e Tūtotonu mai se osofa’iga ‘o masini felelei fa’atonutonu (drones) ‘a Iran ‘i le fa’ai’uga ‘o le vaiaso, ‘ae ‘o lo’o saogalēmū ‘uma la lātou ‘aufaigāluega.

Na saunoa le Minisitā ‘o le Puipuiga ‘a ‘Ausetālia, Richard Marles, ‘e fa’amaonia līpoti, ‘i a’afiaga ‘o la lātou nofoaga ‘autū ‘i Al Minhad, pe tusa lea ma le 24 kilomita le mamao ‘i saute ‘o Dubai. 

‘E lagolagoina ‘e le Palemia ‘o ‘Ausetālia, Anthony Albanese le osofa’iga ‘a le Iūnaite Setete ma ‘Isarā’elu.  Na fa’aalia ‘e fa’apea ‘e to’a 115,000 tagātānu’u ‘Ausetālia ‘i Sasa’e Tūtotonu, ‘e le’o mafai ‘ona malaga ‘ese ‘ona ‘o le tāpuniga ‘o feoā’iga talu ai le taua.  Talu mai le tausaga ‘e 2003, na tali ai ‘i le nofoaga ‘autū ‘o le Al Minhad Air Base, vaegā’au ‘a ‘Ausetālia ma ‘avea ma nofoaga ‘autū ‘a ‘Ausetālia ‘i ana gāluega fa’atino ‘i totonu ‘o Sasa’e Tūtotonu. 

‘E o’o atu ‘i le to’a 80 tagata ‘Ausetālia ‘i lea nofoaga ‘i so’o se taimi, ‘e tusa ai ma fa’amatalaga ‘a le militeli ‘a ‘Ausetālia.

Link to RNZ World News (Article) translated: https://www.rnz.co.nz/news/world/588498/australia-s-middle-east-military-hq-hit-by-iranian-drone-attack

ATA: RNZ / Samuel Rillstone