Lau le i’uga ‘o Donald Trump ‘i le aso 10 ‘o Ianuari 2025

‘I le Iūnaite Setete ‘o ‘Amerika – Na fa’aalia ‘i se līpoti ‘a le vāega fa’asalalau ‘o le AP, le Associated Press, ‘i le a’ai ‘o Niu Ioka, ‘o lea ‘ua fa’atūlagaina  le aso 10 ‘o le māsina lenei ‘o Ianuari, ‘e lauina ai le fa’ai’uga ‘a le Fa’amasinoga, ‘e tusa ‘o le matā’upu na fa’amaonia ai le solitūlāfono ‘a le ali’i presetene filifilia ‘o Donald Trump, ‘i lona totogiina atu lea ‘o se vaegātupe ‘i se tama’ita’i ‘ina ‘ia taofia ai ‘o ia mai le fa’ailoaina fa’alaua’itele ‘o sā lā’ua fa’anumuni sā faia ‘i aso ‘ua mavae.

‘O lea fuafuaga ‘a le Faamasinoga, ‘o lona uiga ‘o le ‘ā muamua ‘ona tōlaulauina ai le fa’ai’uga ‘o le matā’upu lenei, ‘a’o lumana’i ai le aso ‘e fa’atautōina ai āloa’ia Donald Trump mō lona toe tau’aveina ‘o le tofi peresetene ‘o ‘Amerika ‘i le aso 20 ‘o Ianuari.

‘O lea fo’i ‘ua ‘uma ‘ona fa’ailoa mai ‘e le Fa’amasino ‘o lo’o feagai ma lenei matā’upu, ‘o le ‘ā lē ‘avea Trump ‘i le falepuipui ‘i lenei matā’upu.  ‘Ae peita’i, ‘ua fa’ailoa mai, ‘e mautinoa lava ‘o lenei fa’ai’uga, ‘o le ‘ā ‘avea ai Donald Trump ma ulua’i peresetene ‘o ‘Amerika, ‘ua fa’amaonia ni moliaga solitūlāfono na mōlia ai ‘i luma ‘o le fa’amasinoga.

‘E pei ‘ona silafia ‘ua ‘uma ‘ona fa’amaonia le solitūlāfono ‘a Trump ‘i le matā’upu lenei, mā ‘e ono mafai ‘ona fa’asalaina ai ‘o ia ‘i se sala tupe, po’o le fa’anofo va’ava’aia pē falepuipui ai fo’i mō le ‘umi ‘e o’o ‘i le fā tausaga.  ‘Ae pei ‘ona tā’ua, ‘o lea ‘ua ‘uma ‘ona fa’ailoa mai fa’alaua’itele ‘e le Fa’amasino ‘o lo’o feagai ma lenei matā’upu, ‘e leai se fa’asalaga fa’a-falepuipui ‘o le ‘ā tu’uina atu ‘i le ali’i ‘o Donald Trump.

Link to RNZ (Article) translated by Lauano Ilaoa: https://www.rnz.co.nz/news/world/538139/trump-must-be-sentenced-in-hush-money-case-judge-signals-no-jail

ATA:  Royalty-Free Images