Lapata’iga mai le ta’ita’i fa’alelotu ‘o Iran

‘Ua fa’ailoa mai ‘e le Ta’ita’i Fa’alelotu ‘o le Mālō Iran, ‘o Ayatohlla Ali Khamanei, ‘o le ‘ā mamafa le tali atu ‘a Iran ‘i le mālō ‘Isarā’elu ‘ae fa’apea ai ma le Iūnaite Setete ‘o ‘Amerika, ‘ona ‘o le osofa’iga lata mai nei ‘a ‘Isarā’elu fa’asaga ‘iā Iran.

‘O lenei lapata’iga mai le ta’ita’i ‘o Iran, ‘ua faia ‘i le taimi tonu ‘ua ‘ātoa ‘i ai le 45 ‘o tausaga talu ‘ona osofa’ia ‘e tagata tete’e ‘i le ‘a’ai ‘o Teheran le ‘Ōfisa ‘o le ‘Amepasa ‘o ‘Amerika ma o lātou tāofia ai fa’amālosi lona ‘amepasa ma tagata faigāluega.  Na fa’aalia ‘i le Aso Sā ‘e Ayatohlla Ali Khamanei, ‘o le ‘ā mamafa le tali mai’ a Iran ‘i osofa’iga ia na faia ‘a ‘Isarā’elu fa’asaga ‘iā Iran ma atunu’u lātou te faifaimea fa’atasi.

‘Ua faia lenei fa’aaliga ‘a Khamanei, ‘ae ‘ua mātauina le fa’atetelē ‘o fa’a’upuga mai sui ‘o le mālō Iran, ‘e atagia ai le ono faia ‘o se isi a lātou ‘osofa’iga fa’asaga ‘iā ‘Isarā’elu, ‘e tali ai ‘i le osofa’ia ‘e ‘Isarā’elu ‘o Iran ‘i le Aso 26 ‘o ‘Oketopa, lea na fa’aleagaina ai nofoaga ‘o le militeri na fasiotia ai tagata ‘e to’alima.

Link to RNZ (article) translated by Savelina Kasiano:https:https://www.rnz.co.nz/news/world/532016/iran-warns-it-will-defend-itself-after-israeli-strikes

Ata: A general view of Tehran after several explosions were heard in Tehran on 26 October, 2024. : AFP/Atta Kenare