Fe’au fa’amanuia ‘o le Kerisimasi ‘a le Tupu ‘o Sālesa

‘O Niu Sila le atunu’u muamua ‘i Mālō ‘o le Taupulega na muamua fa’asalalau ai le fa’amanuiaga ‘o le Kerisimasi a le Tupu ‘o Sālesa ma sā momoli atu lana fe’au mo le Kerisimasi mai se malumalu laitiiti ‘i totonu ‘o se falema’i tuai ‘ae lē ‘o māota ‘o le Tupu pei ‘ona māsani ai.

Sa fa’afetaia ai ‘e le tupu le ‘au’aunaga ‘a fōma’i ‘ona ‘o la lātou tautua ma lō lātou taumauga ‘i la lātou gāluega.  Na ia fa’afetaia ‘i lātou ‘o lo’o tausia isi tagata ma saunoa ai, ‘e iai lava se vāega ‘o le ōlaga ‘e feagai ai le tagata ta’ito’atasi ma faigatā, ‘ā lē ‘o le mafaufau, ‘o le agaga.  ‘Ae ‘o le mamao ‘e o’o ‘i ai le fesoasoani ‘o lē tasi ‘i le isi, ‘o se fua fo’i lea ‘o le fegalegalea’i ma le gālulue fa’atasi ‘ua iai mālō ta’itasi.    ‘I lana saunoaga mai le Fitzrovia Chapel ‘i Lonetona, sa ia fa’afetaia ai fo’i tagata ‘uma na ofo alofa atu ‘e ala ‘i ‘upu fa’amāfanafana ma fa’alā’ei’au. 

Sa ia toe tō mānatu ai ‘i lana asiasiga ‘i lenei tausaga ‘i le Vasa Pasefika ma ‘Ausetālia ma sa fa’amanatu atu ai ‘iā te ia le tasi felanulanua’i ‘o aganu’u, ma itū’āiga ‘o tagātānu’u ‘ese’ese fa’apea le fa’atuatua, ‘ua maua ai le mālosi, ‘ae lē ‘o le vaivai.

Na tā’ua fo’i ‘e le Tupu ‘o Sālesa a’afiaga ‘o tagata mai taua ma fevaevaeā’iga ‘o lo’o fa’aauau pea ‘e aofia ai Sasa’e Tūtotonu, Ukraine ma ni vāega ‘o ‘Aferika.  ‘O le fe’au ‘a ‘āgelu ‘i le ‘au leoleo māmoe, ‘o le ‘ā iai le fīlēmū ‘i le lalolagi ma ‘ua moni ‘i lenei vaitau mō tagata ‘o lo’o faia le lelei ‘i lenei lalolagi. Ma sa ia ofo atu ai ana fa’amanuiaga mo se Kerisimasi fiafia ma le fīlēmū mō tagata ‘uma.

‘O le saunoaga fa’amanuia ‘a le Tupu ‘o Peretānia ‘e māsani lava ‘ona pu’eina ‘i le Buckingham Palace po’o le Windsor Castle ‘i le māsina ‘o Tēsema ma fa’asalalau ‘i televise ma leitiō ‘i le ītūlā ‘e 3 ‘i le aoauli ‘o le Aso Kerisimasi ‘i Peretānia.  ‘O le ulua’i fa’asalalauga ‘o le fa’amanuiaga ‘o le Kerisimasi ‘a le ‘Āīgā tupu, na saunoa ‘i ai le Tupu ‘o Siaosi le Lima ‘i le 1932. 

Link to RNZ (Article) translated by Savelina Kasiano: https://www.rnz.co.nz/news/world/537594/king-charles-delivers-his-annual-christmas-message

ATA: King Charles III.