Feagai ‘Isaraelu ma se solo tete’e

‘Ua feagai ‘Isaraelu ma se solo tete’e ‘a le faitau fia afe ‘o tagata ‘ua taofia ai gāluega ma ‘au’aunaga ‘i le atunu’u ‘atoa, ‘ona ‘o le mana’o ‘e fa’a’uma le taua ma le Hamas ‘i totonu ‘o Gaza.

‘E lē ‘o fiafia le to’atele ‘o tagata ‘i le ali’i Pālemia ‘o Benjamin Netanyahu ma lona fa’afoeina ‘o talanoaga ma le Hamas mo le tatalaina mai ‘o tagata ‘Isaraelu ia na lātou ‘ave fa’amālosi ‘i le aso 7 ‘o ‘Oketopa.

‘Ua iloga ‘ona lē fiafia tagata ‘o ‘Isaraelu, ‘ona ‘o le maua ‘o tino maliu ‘o tagata ‘Isaraelu ‘e to’aono ‘i totonu ‘o se tunnel, ‘o lātou ‘uma nei ‘o nisi ia ‘o tagata na taofia fa’amālosi ‘e le Hamas talu le lātou osofa’iga lea na māfua ai le taua ‘o lo’o fai nei ‘i Gaza, ‘ae ‘o le vaiaso fo’i talu ai na maua ai le tino maliu ‘o se isi fo’i tagata ‘Isaraelu sā taofia ‘e le Hamas.

‘O le mana’o ‘o tagata ‘i le taimi nei, ‘ua tatau ‘ona fa’a’uma loa le taua, lea ‘ua faitau fia sefulu afe le aofa’i ‘o tagata ‘ua māliliu ai.

Link to RNZ (Article) translated by Lauano Ati Ilaoa: https://www.rnz.co.nz/news/world/526808/protests-grip-israel-after-six-hostages-killed-in-gaza

ATA: Gili Yaari / NurPhoto via AFP / RNZ.