Faitau fia selau afe tagata ‘ua lēai se ‘eletise ‘ona ‘o le afā mālosi ‘o Alfred na a’afia ai Kuiniselani

‘I ‘Ausetālia, ‘e faitau fia selau afe le aofa’i ‘o tagata ‘ua motusia le ‘eletise mai ‘o lātou fale ‘i le setete ‘o Kuiniselani, ‘a’o tūmau pea ‘ona fa’amamalu lapata’iga ‘o tāfega ma lōlōga mamafa ‘i vāega ‘i mātū ‘o le setete ‘o New South Wales, ‘ona ‘o le ogaoga ‘o le fa’atāfunaina ‘o le talafātai ‘i sasa’e ‘o le atunu’u, ‘e le afā mālosi ‘o Alfred.

‘E o’o mai ‘i le Aso Sā ananafi, ‘e tusa ma le 316,540 le aofa’iga ‘o fale ‘o tagata ‘i Queensland ‘ua motusia ai le ‘eletise, ‘e aupito ‘i to’atele ‘i le Gold Coast, lea ‘e sili atu ‘i le 112,000 afe le aofa’iga ‘o ‘āiga ‘ua a’afia ai.  Na fa’aalia mai, ‘e ui ‘ina ‘o lea ‘ua fa’aitiitia le mālosi ‘o le afā ‘o Alfred, ‘ae ‘o le ‘ā fa’aauau pea mō nai aso ‘o lumana’i nei ‘ona mamafa tīmuga ma mālolosi matagi tō faata’uta’u ‘aemaise ‘o a’afiaga ‘o galu ‘i nu’u tū matāfaga.  ‘O le taimi nei, ‘ua faia ni lapata’iga fou ‘e lē ‘ofisa vā’ai tau, mō nisi lōlōga ‘e a’afia ai vāega ‘i sautesasa’e ‘o Kuiniselani ma mātū ‘o NSW, ‘ona ‘o tīmuga mamafa ‘o lo’o fa’aauau pea.

‘O vāega ‘e aofia ai le ‘a’ai ‘o Brisbane, fa’apea Ipswich, ‘o le Sunshine Coast ma Gympie, ‘o lo’o ‘i aupito sili ‘ona a’afia ‘i ia tūlaga fa’alētonu ‘i le taimi nei.  Na fa’ailoa mai ‘e le ‘ōfisa ‘o le tau, ‘ua mātele ‘ina fa’aitīitia le mālolosi ‘o matagi, ‘a’o se’ese’e atu ‘i sisifo vāega ‘o totoe ‘o le afā, peita’i ‘e o’o atu ‘i le 90 kilomita ‘i le itūlā le mālolosi ‘o savili pe ‘ā tō fa’ata’uta’u mai ‘i nisi ‘o taimi.

Lipotia mai le matuā pisi ‘o gāluega fesoasoani ‘o lo’o taumafai ‘e tu’uina atu fesoasoani ‘i tagata ‘o lo’o mana’omia ‘i itū ‘ese’ese ‘o le setete.  ‘I mātū ‘o NSW, ‘e 61 tausaga le matua ‘o se ali’i na maua ‘e gāluega lavea’i, ‘ua maliu ‘e masalomia na tafea ‘i lōlōga ‘e lē mamao mai le nu’u ‘e igoa ‘o Dorrigo.

Lipotia mai fo’i le lāvevea ‘o ni ta’avale ‘a le fitafita ‘a’o āga’i atu ‘e fesoasoani ‘e nisi ‘i mātū ‘o NSW…ma mānunu’a ai le ‘aufaigāluega.  Na tā’ua ‘e fa’apea ‘o le tele ‘o tagata sā mana’omia se fesoasoani, ‘o ‘i lātou sā taumafai ‘e ō ‘iā lātou ta’avale ‘i le loloto ‘o lōlōga ma tāfega.

Sa fa’aalia mai ‘e le palemia ‘o le setete ‘o Kuiniselani, ‘o David Crisafulli, ‘o le ‘ā fa’alagolago le toe tatalaina ‘o ā’oga ia sā tapunia ‘i le vaiaso ‘ua mavae ‘ona ‘o le afā ‘o Alfred, ‘i tūlaga ‘o le saogalēmū.

Link to RNZ (Bulletin): https://www.rnz.co.nz/national/programmes/morningreport/audio/2018978164/cyclone-alfred-leaves-many-without-power-in-qld-and-nsw

ATA: DAVID GRAY / AFP (RNZ).