Fai meāalofa Salesa III ‘i le Palemene ‘o New South Wales

‘I Sini ‘i ‘Ausetālia, sā fai meāalofa le Tupu ‘o Salesa III, ‘i se tioata ‘e fua ai le taimi po’o se hourglass, ‘i le Palemene ‘o le setete ‘o New South Wales ‘i le taimi ‘o sana āsiasiga ‘i ai ‘i le Aso Sa ananafi.‘O le fa’amoemoe ‘o lea meāalofa, ‘ina ‘ia fa’aaogā ‘e fua ‘i ai le ‘umi ‘o saunoaga ‘a faipule ‘i totonu ‘o le Palemene, ‘i le fa’amanatuina ‘o le 200 tausaga ‘o le maota maualuga ‘o lea setete ‘o ‘Ausetālia.

Sā muamua ‘ona feiloa’i lana maiesetete ma le masiofo ‘iā Camilla ma le mamalu lautele ‘o tagata sā ‘i fafo ‘a’o le’i tau’a’aoina lana meāalofa lenei ‘i ta’ita’i ‘o le faigāmālō ‘a New South Wales, ‘i  le ulua’i aso ‘o la lā’ua āsiasiga taualoa ‘i ‘Ausetālia.‘O lo’o fa’atūlagaina, ‘a tu’ua ‘Ausetālia ‘i le vāiaso nei, ‘ona malaga ane loa lea ‘o Salesa III ma le masiofo ‘i Sāmoa mō le tatalaina ‘o le Fono ‘a Ta’ita’i ‘o Mālō ‘o le Taupulega, ‘i le Aso Tofi.

Translated by Lauano Ilaoa