Fai ma mea ūla le Talisuāga Mulimuli ‘a Iesu ‘i le ‘Ōlimipeka

‘Ua fa’aālia ‘e ta’ita’i ‘o ‘ekalesia fa’apea fa’alāpotopotoga kerisiano ‘i le lalolagi, le lē fiafia ‘i faiga na fa’alumaina ai le sauniga ‘o le Talisuāga po’o le Tausamiga Mulimuli ‘a le Ali’i Fa’aola ‘o Iesu Keriso ma lana ‘au so’o, ‘i se tasi ‘o fa’afiafiaga ‘o le tatalaina ‘o le ‘Ōlimipeka ‘o le 2024 ‘i Pale, Farani.

‘O lenei fa’afiafiaga ‘o lo’o va’aia ai se fafine ‘o lo’o faia se paleāli’i ‘ua fa’atusaina ‘o Iesu, ‘ae ‘o lo’o si’omia ‘e tagata ‘ua fa’aigoaina ‘o drag queens, po’o ni tamāloloa ‘ua fia fai ma fafine, ma fa’aalia mai lea tūlaga ‘i ō latou lava ‘auala ‘ese’ese, ‘ua fa’atusaina ‘i le ‘au so’o.

‘O nei faiga ‘ua fa’aālia ai le lē fa’aaloaloina ‘o lenei sauniga ‘e tāua ‘i tino ‘o keriso, po’o ‘ekalesia kerisiano ‘i le lalolagi, ma ‘ua vala’au ai tagata ‘e to’atele, ta’ita’i ‘o lotu, ma ta’ita’i fa’alēmālō ‘e pei ‘ona ‘iai le fa’aseā ‘a le Fofoga Fetalai ‘o le Maota ‘o le Mālō tele ‘o ‘Amerika, Mike Johnson, ‘e boycott le ‘Olimipeka.

‘Ua fa’atumulia fo’i ‘upega ‘o feso’ota’iga ‘i tusitusiga ‘a le lautele ‘e fa’aleo ai le lē fiafia ‘i lenei mea na tupu.

ATA: Courtesy of Paris 2024 Olympics.