Fa’atoilaloina le faigāmālō ‘a Bashar al Assad ‘i Sūria

‘Ua fa’amuta ‘i se fouvale ‘a tagata tete’e, le faigāmālō ‘a le ali’i Peresetene ‘o Bashar al Assad, ‘i totonu ‘o le atunu’u ‘o Suria, ‘i le itūlagi ‘i Sasa’e Tūtotonu.  ‘O le Aso Sā ananafi, na fa’ailoa mai ai ‘e le fitafita ma le vaegā’au ‘a le Mālō Sūria, ‘ua lē ‘o toe iai nei le faigāmālō, lea ‘ua 24 tausaga ‘o ta’ita’ia ‘e le ali’i peresetene ‘o Assad’

Na tā’ua ‘i se līpoti ‘a le Reuters, ‘o lea fa’asalalauga ‘a le fitafita ‘a Sūria, ‘ua soso’o ma se osofa’iga ‘a fitafita tete’e, lea ‘ua matuā fa’ate’ia ai le lalolagi, ‘ona sā mamao ma manatu le ono tūla’i mai ‘o se mea fa’apea ‘i totonu ‘o le mālō Sūria.  Peita’i, na fa’ailoa mai ‘e fitafita tete’e, ‘o lea ‘ua sa’oloto nei Tamaseko mai pūlega ma le ta’ita’iga ‘a le ali’i lenei ‘o Assad.

‘O  le Aso Sā lava ananafi, lea ‘e fa’apea na tu’ua ai ‘e Assad le ‘a’ai ‘o Tamaseko, ma malaga ‘ese atu ai ‘i se va’alele mō se atunu’u ‘e le’i fa’ailoaina mai fa’alaua’itele.  ‘O le pa’ū ai ‘o le faigāmālō ‘a Assad ‘ua fa’amuta ai pūlega sauā ma faigāmālō pulepuletutū ‘a lenei ali’i mā lona ‘au’āiga ‘i totonu ‘o Sūria, ma ‘ua ‘avea ‘o se tūlaga lē manuia mō le mālō Rusia ‘ae fa’apea le mālō Iran, ‘ona ‘o lea ‘ua lēai se tasi ‘o ā lā’ua pā’aga vāvālalata ‘i le ‘ōgātotonu ‘o lea itūlagi ‘o le kelope.  Tā’ua mai ‘i Uōsigitone, le mata’itūina ‘o mea ‘ua aliali mai nei ‘i Sūria, ‘e le ali’i peresetene ‘Amerika ‘o Joe Biden ma lana faigāmālō.

ATA: 1 News.