Fa’ato’ese le Peresetene ‘o Iran ‘i atunu’u tuā’oi ‘i le Fagaloa ‘o Peresia

‘O le asō ‘ua ‘atoa iai le sefulu ‘o aso talu ‘ona faia osofa’iga ‘a ‘Amerika ma ‘Isarā’elu ‘e fa’asaga ‘i le atunu’u ‘o Iran, ma ‘amata ai le taua lea ‘ua vevela ai nei ‘i Sasa’e Tūtotonu.

‘O le Aso To’ona’i lea na faia ai se fa’asalalauga aloā’ia ‘a le Peresetene ‘o le mālō Iran ‘i luga ‘o le televise ma ia fa’ato’ese ane ai ‘i mālō latou te tuā’oi ‘i le Fagaloa ‘o Peresia, ‘ona ‘o osofa’iga ‘ua ‘uma ‘ona fai ane ‘i ia atunu’u ‘e le fitafita ‘a Iran.

Sa fa’aālia ai ‘e le ali’i peresetene ‘o Masoud Pezeshkian, ‘i lea fa’asalalauga, ‘e lē toe faia nisi osofa’iga ‘a Iran ‘i atunu’u ‘Alapi nei latou te tuā’oi, sē’ia vaganā, ‘ua fa’aaogāina ō latou laufanua ‘e faia ane ai ni osofa’iga āga’i atu ‘iā Iran.

Peita’i, ‘o nai itūlā mulimuli ane ai, ‘ae lipotia mai le pāpā ‘o ni meatau fa’atonutonu ma ni pomu ‘i totonu ‘o atunu’u ‘e āofia ai Bahrain, Qatar, ma le UAE -le United Arab Emirates.

‘O le Aso Sā lea na fa’ailoa mai ai ‘e le ali’i peresetene ‘Amerika ‘o Donald Trump, ‘i luga ‘o le Truth Social, ‘e fa’apea, ‘o le ‘a āga’i ‘ina mamafa osofa’iga fa’asaga ‘iā Iran, ma ‘ua iai le fuafuaga ‘e fa’alautele atu ‘i isi vāega ‘o lenei atunu’u ia osofa’iga ‘a ‘Amerika.

‘Ua ‘uma ‘ona folafola ‘e Donald Trump, ‘o le taua ‘ua faia nei ma Iran, ‘e fa’atō’a tāofi ma tu’u, pē ‘a si’ilima aloā’ia le Mālō ‘o Iran.

ATA: Getty Images / BBC.