Fa’ase’etuāgalu Joe Biden mai le pālota ‘a Amerika mō le tofi Peresetene

‘Ua fa’amutaina ‘e le Peresetene ‘o le Iūnaite Setete ‘o ‘Amerika, Joe Biden, lona tauvā ai ‘i le tofiga Peresetene ‘i le pālota tele ‘iā Novema, ‘ina ‘ua fa’aleo ‘e nisi ‘o sui ‘o la lātou Vāega Fa’a’upufai ‘a le Democrats, ‘e lē toe gafatia ‘e lona mālosi ‘ona fa’afaiā’ina le sui ‘o le Republicans, Donald Trump.

‘I se tusitusiga ‘a Biden ‘i luga ‘o le X, ‘o lo’o ia tā’ua ai, ‘o le ‘ā fa’aauau pea ‘ona tau’ave lona tofiga Peresetene ‘i le taimi nei se’ia o’o atu ‘iā Ianuari 2025 ma ‘o le ‘ā faia sana saunoaga ‘i le atunu’u ‘i le vāiaso nei. ‘Ua ia tu’u atu lana lagolago ‘i le Sui Peresetene, le tama’ita’i o Kamala Harris ‘e fai ma o lātou filifilia ‘a le Democrats.

‘Ua 81 tausaga ‘o le soifua ‘o Biden, ma sā fa’aopoopoina pea ‘ona fesiligia le tūlaga ‘o lona mālosi ma ūna’ia ‘e nisi mai lana Vāega Fa’a’upufai ‘ina ‘ia fa’ase’e ‘ese, ‘ona ‘o ni fa’afitauli ‘i lana fa’atinoga ‘i le fa’afīnauga po’o le debate ‘i le māsina ‘o Iuni ma le sui ‘o le Republicans, Donald Trump.

ATA: President Joe Biden (file).