Fa’amavae se tasi tagata faigāluega ‘i le AI ‘ona ‘o popōlega ‘i le saogalēmū

‘O le talitonuga mausalī ‘o tagata ‘e fauina le AI po’o le poto fa’afōliga ‘o masini komipiuta, ‘e mafai ‘ona fa’a’umatia ‘e le AI ‘i tātou ‘uma ‘i le fa’ai’uga ‘o le isi sefulu tausaga.  ‘O se fa’amatalaga lea ‘a Jacob Coxon, ‘o se tagata faigāluega 27 tausaga le matua ‘i le Anthropic, ma na fa’asalalauina solo lana fa’amatalaga ‘i le Aso Lua, ‘ina ‘ua fa’amāvae mai le kamupanī.  ‘O ia ‘o se tagata su’esu’e ‘i le AI. 

‘Ua mātauina le fa’aleotele ‘e tagata faigāluega ‘i le AI ‘o ni o lātou manatu, ‘i taimi ‘e fa’amāvae ai mai kamupanī ‘o gālulue ai, ‘ona ‘o o lātou popōlega ‘i le lamatia ‘o le saogalēmū ma le puipuiga pei ‘ona molimauina ‘i nai māsina ma nai tausaga ‘ua tuana’i atu.  ‘O isi na o lātou fa’aleoina fa’alaua’itele lava ‘o lātou atugaluga ‘ona ‘e fa’apea ‘ua televave tele le alu ‘a le tēkonolosi, ma ‘e iai lava le aso ‘i le lumana’i, ‘e lē mafai ai ‘e le mālosi ‘o le tagata ‘ona toe pūleaina.

‘O lo’o fa’apupula mai ‘i le fa’amāvaega ‘a Coxon le ogaoga ‘o tūlaga ‘e o’o ‘i ai, ‘ona ‘e fa’apea, ‘e le’o toe mamao, ‘ae mafai ‘e ni polokalame ‘ua sili atu le mālolosi, ‘ona tatala pe hack so’o se mea, mafai ‘ona tasui so’o se vāega lava ‘i se taimi pu’upu’u ma maua le mālosi’aga ma le paoa fa’apea ai ma mea tāua ‘uma.

‘O le māsina ‘o Iulai, na sainia ai ‘e le lata ‘i le 1400 ‘o ni tagata faigāluega ‘i le AI, se tusi fa’alaua’itele, na o lātou talosagaina mālosi ai le mālō ‘o le Iūnaite Setete, ‘ina ‘ia faia se tūlāfono ‘i le tēkonolosi, ‘e fa’asaga ‘i kamupani tetele ‘o le Tēkonolosi, ma fa’atuai ai le saosaoa lea ‘ua iai le AI, ‘ina ‘ia fa’amautinoa le saogalēmū ma puipuiga mai le AI.  Lua aso talu ai, na fa’aleo ai se lapata’iga ‘a le Saienitisi Sinia ‘a le OpenAI, ‘o Jakub Pachocki ‘i mālosi’aga ‘o le AI ‘e fa’apea ‘ua saoasaoa tele nai lō le mālosi’aga ‘o le ‘au su’esu’e ‘e mafai ai ‘ona māta’itūina lelei, ma pūleaina lelei le AI.

Link to RNZ (Article): https://www.rnz.co.nz/news/world/1320288/gambling-with-our-lives-another-ai-employee-quits-over-safety-concerns

IMAGE/ATA: SCR (file).