Fa’amaonia Peresetene Joe Biden ‘i le Kōviti-19

‘Ua a’afia Peresetene Joe Biden ‘i le Kōviti-19 ‘a’o iai ‘i lana malaga ‘i Las Vegas mā ‘e le’o tūgā tele ni āuga ‘o lo’o a’afia ai pei ‘ona fa’aalia ‘e le Fale Pa’epa’e.  Na fa’aalia ‘e se tasi ‘o failautusi ‘o le Fale Pa’epa’e, ‘ua māe’a ‘ona faia tui puipui ‘o le ali’i peresetene.  Sa faia le folasaga ‘a le Peresetene ‘o le fa’alāpotopotoga Latino ‘o le UnidosUS, ‘ē lē mafai ‘ona saunoa Biden ‘i sa lātou fa’atasiga sā fuafuaina ‘ona ‘ua a’afia ‘i le Kōviti. 

‘O lo’o fa’aauau ‘ona fe’ese’esea’i Biden ma nisi lava ‘o lana Vāega Fa’aupufai a le Democrats ‘ona ‘o lo lātou popōlega ‘e fa’apea ‘ua fai si matua tele ‘o Biden ‘e lē aogā ‘ona toe tauvā ‘i le pālota ma ‘ua mānana’o ‘e fa’ase’etuāgalu ‘ae fa’atula’i atu se isi sui ‘e tauvā ma Donald Trump lea ‘ua filifilia ‘e le Republicans ‘e ‘avea ma o lātou sui tauvā.   Sā fa’aopoopoina le puipuiga mō Trump talu mai le taimi na taumafai ai le ali’i talavou ‘o Thomas Matthew ‘e tagatavaleina ‘i se fa’atasiga mō fa’atōsina ‘o le faigāpālota ‘i le Aso Sā talu ai.  Sa fa’ailoa ai fo’i ‘e lēai se feso’ota’iga ‘o ‘se taufa’amata’u ‘a Iran ma lea matā’upu. 

Sā fa’aleo fo’i ‘e Peresetene Biden sona finagalo ‘ina ‘ia fa’asāina itū’āiga fana ia na fa’aaogā ‘e Matthew ‘e tau tagatavaleina ai Trump.  Na āfāina se vāega ‘o le taliga ‘o Trump ‘i lea osofa’iga peita’i ‘e le’i tu’ua ai lona ‘āuai ‘i le fa’atasiga na āloa’ia ai le ‘avea ‘o ia ma sui filifilia ‘a le Republicans mō le faigāpālota.

ATA: US President Joe Biden / RNZ.