Fa’aauau pea osofa’iga ‘a Iran ma ‘Isarā’elu

‘O lo’o fa’aauau pea osofa’iga ‘i le vā ‘o ‘Isarā’elu ma Iran, ma ‘o lo’o fa’aauau  ai fo’i ‘ona alu a’e ‘i luga ma le aofa’iga ‘o tagata ‘ua māliliu ai ‘i totonu ‘o ia atunu’u ‘e lua, talu mai le ulua’i osofa’iga lea na faia ‘e ‘Isarā’elu ia ‘i le Aso Faraile talu ai.

‘O līpoti lata mai, na fa’aalia ai ‘e le mālō Iran, ‘ua o’o ‘i le 78 le aofa’iga ‘o tagata ‘ua māliliu ‘i le osofa’iga muamua ‘a ‘Isarā’elu ‘i le Aso Faraile ma le to’atele ‘o isi mulimuli ane ai, ‘e aofia ai le 60 tagata na a’afia ‘ina ‘ua pa’ū se fale tele fogāfale 14 ‘i le ‘a’ai ‘o Teheran na lavea ‘i se pomu ‘a ‘Isarā’elu. ‘O le 29 ‘o ē na māliliu ‘i lea pomu, ‘o tamaiti, ‘e tusa ‘o le fa’asalalauga ‘a le mālō Iran.

‘I ‘Isarā’elu, ‘ā itiiti mai, ‘e to’asefulu tagata ‘ua māliliu ‘i osofa’iga ‘a le mālō Iran na tali ane ai ‘i osofa’iga ‘a ‘Isarā’elu.

‘Ae ‘ua fa’aalia mai ‘e le peresetene ‘Amerika ‘o Donald Trump, ‘o lenei fe’ese’esea’iga ‘e mafai ‘ona vave taofia ma fa’a’uma ‘i’le vā ‘o itū ‘e lua, ma sā ia lapata’ia ai le mālō Iran, ‘ina ‘ia ‘aua ne’i taumafai ‘e osofa’ia ni nofoaga ‘o le Mālō ‘Amerika.

‘Ua musu le mālō  Iran ‘e fa’aauau talanoaga ‘i le vā ma le mālō ‘Amerika ‘e uiga ‘i meatau fa’aniukilia, ‘e manatu le mālō ‘Amerika, ‘ona pau lea ‘o le ‘auala vave ma faigōfie ‘e mafai ‘ona taofia ai osofa’iga ‘a Isarā’elu fa’asaga ‘iā Iran…

 ‘Ae ‘o ananafi lea na fa’ailoa ai fa’alaua’itele ‘e le palemia ‘Isarā’elu ‘o Benjamin Netanyahu, ‘e le’i va’ai Iran ‘i se mea mata’utia ‘i isi a lātou osofa’iga ia ‘o lo’o fuafua ‘e faia ‘i ai.

‘O le fa’a’upuga fo’i mai le ali’i peresetene ‘Amerika ‘o Donald Trump, na ia tā’ua ai, ‘o le ‘ā fa’aaogā ‘uma le mālosi fa’afitafita ‘o le Iūnaite Setete ‘iā Iran, pe ‘ā fai ‘e te’i ‘ua āfāina atu ai ‘Amerika ‘i ana osofa’iga ‘o lo’o faia nei ‘iā ‘Isarā’elu.

Link to RNZ (Article) translated: https://www.rnz.co.nz/news/world/564177/israel-and-iran-strike-at-each-other-as-trump-says-conflict-can-be-easily-ended

ATA: AFP/ATTA KENARE & AFP/JACK GUEZ / RNZ.