‘Ātoa le tausaga ‘o le taua ‘i Gaza

‘E faitau afe tagata, sā ‘āuai ‘i ni solo sā faia ‘i nisi ‘o ‘a’ai tetele ‘o le lalolagi ‘i le fa’ai’uga ‘o le vāiaso, ‘e fa’aalia ai lo lātou lagolagoina ‘o Palesitina ma ona tagata, ‘a’o lumana’i ai le ‘ātoaga ‘o le tausaga talu ‘ona faia le taua ‘o lo’o vevela nei ‘i totonu ‘o Gaza ‘i le vā ‘o ‘Isarā’elu ma le Hamas.

‘O atunu’u na lipotia mai ai ia solo, ‘i le Aso To’ona’i, ‘e aofia ai Peretānia, Falani, ‘Aferika ‘i Saute, fa’apea ‘Aialani ma Suiselani.

‘O le ‘auga ‘o ia solo, ‘ina ‘ia tāofia loa ma fa’auma le taua ‘i Gaza, lea ‘ua fa’aalia ‘ua maumau ma fano ai soifua, ‘o le sili atu ma le 42,000 afe ‘o tagata, ‘e mātele lava ‘i tagata lautele ‘e aofia ai ma tamaiti.  Sā mātele lava ‘ina fīlēmū ma to’amālie le fa’atinoga ‘o nei solo, ‘e ui ‘ina ‘e to’a 15 tagata na tāofia ai ‘e leoleo ‘i le ‘a’ai ‘o Lonetona.

‘E tele sauniga ‘o lo’o fa’atinoina ai ‘i atunu’u ‘ese’ese ‘o le lalolagi, ‘i le asō, le aso 7 lenei ‘o ‘Oketopa ‘ua ‘ātoa lelei ‘i ai le tasi le tausaga talu ‘ona osofa’ia ‘e le Hamas ‘Isarā’elu ma māfua mai ai le taua lenei ‘i Gaza.

‘I ‘Isarā’elu, ‘o le ‘a’ai ‘o Ierusalema ‘e faia ai le lātou sauniga fa’amanatu ‘i le asō, ‘e ta’ita’ia ‘e le ali’i peresetene ‘o le atunu’u, ‘o Isaac Herzog.