Āga’i ‘Amerika ‘i fale pālota ‘e filifili ‘iā Harris po’o Trump mō le isi Peresetene

‘Ua o’o mai ‘i le aso tonu ‘o le faigāpālota tele ‘a le mālō ‘o le Iūnaite Setete ‘o ‘Amerika, ‘e filifili ai po’o Kamala Harris po’o Donald Trump ‘o le ‘ā ‘avea ma peresetene ‘e soso’o ai nei.  ‘I ni pālota ‘e sa’ili ai ni finagalo ‘o tagata lautele, ‘o lo’o vāvālalata lava le lagolago mo sui ‘e to’alua ‘i setete ‘e fitu ia ‘e fōliga ‘e ono iloa ai po’o ai ‘o le ‘ā manumalo, Arizona, Georgia, Michigan, Nevada, North Carolina, Pennsylvania ma Wisconsin. 

‘O le latalata ‘i le ītūlā ‘e 6 ‘i le taeao analeila taimi Niu Sila, na faia ai le pālota ‘a Trump ‘i Florida.  Na ia saunoa ai, ‘e telē lona talitonuga, ‘o le ‘ā manumālō, mā ‘o le ‘ā lē felāta’i fo’i le i’uga ‘o le faigāpālota.  Na faia le pālota ‘a Harris ‘e le’i o’o mai ‘i le asō.  ‘I Philadelphia ‘i le aso ananafi, na fa’aleo ai ‘e le Sui Peresetene, Kamala Harris, ‘o lana fe’au fia momoli atu, ‘ua sāuni ‘Amerika ‘e la’a ‘i luma ma fa’atuatuana’i ‘i ni ‘upu fai ‘o le mālō ‘ua sefulu tausaga ‘o ta’ialaina ‘i le fefe ma fevaevaea’iga.  Sa fa’agāsolo fa’atōsina fa’ai’u ‘a Donald Trump ‘i Grand Rapids ‘i Michigan pei fo’i ‘ona ia faia ‘i le 2016 ma le 2020 ma sā ia folafola ai, ‘o le ‘ā ia fofōina fa’afitāuli ‘a le atunu’u ma fa’apa’ū lāfoga.  

‘O  Indiana ma Kentucky ‘e muamua tāpunia ‘i le asō a lātou pālota, ‘i le itūlā ‘e 12 ‘i le aoauli taimi Niu Sila, ‘a’o Alaska ‘e mulimuli tāpunia, ‘i le itula e 7 i le afiafi.  ‘Ua lipotia ‘ua tuuina atu e se faamasinoga ‘i Pennsylvania le fa’atagaga i le talosaga a sui o le ofisa faipalota ‘i Cambria County ina ia faaopoopo itula ‘o le palota seia ta le 10 i le po poo le 4 i le afiafi taimi Niu Sila ona o se faaletonu ‘i masini komipiuta na poloka ai le palota.

ATA: 1 News