8.5 miliona komipiuta na ā’afia mai fa’alētonu ‘a le CrowdStrike

Na fa’aalia ‘e le Microsoft, ‘e tusa ma le 8.5 miliona komipiuta ‘i le lalolagi na ā’afia ‘ona ‘o le motusia ‘o feso’ota’iga fa’atēkonolosi.  ‘O se taimi muamua lea, ‘ua iloa ai se fuāinūmera ‘o masini na ā’afia mai ni fa’alētonu ‘o feso’ota’iga fa’atēkonolosi.  Na tā’ua ‘e fa’apea, ‘o le māfua’aga ‘o lea fa’afītāuli, ‘ona ‘o le kamupanī ‘Amerika lea ‘e tā’ua ‘o le CrowdStrike, ‘o se kamupanī mō le puipuiga ‘o feso’ota’iga ‘i luga ‘o initaneti, mā na lafo ‘e le CrowdStrike se suiga fou ‘o se polokalame mō komipiuta (software) ‘i le tele ‘o kamupanī ma fa’alāpotopotoga lātou te fa’aaogāina lea ‘au’aunaga, peita’i, sā iai fa’afītāuli ‘i le polokalame, lea na māfua ai loa ‘ona tūla’i mai le fa’alētonu. 

‘O lo’o fa’aauau pea ‘ona fesoasoani le Microsoft ‘i ē ‘o lo’o ā’afia ai.  Na fa’aalia ‘e le Microsoft, ‘o le fa’alētonu lea na tūla’i mai, ‘o se fa’amanatu tāua tele ‘ina ‘ia siaki lelei ‘e kamupanī ‘e pei ‘o le CrowdStrike, ni suiga ‘iā lātou polokalame (updates) ‘a’o le’i lafoina.  ‘Ua tā’ua ‘e fa’apea ‘o se fa’alētonu pito sili lea ‘ona telē ‘i le tala fa’asolopito ‘o feso’ota’iga fa’atekonolosi ‘i le lalolagi.  Na tā’ua ‘e le Minisitā mō le Pulēga ‘o Fa’alavelave Fa’afuase’i ‘a Niu Sila, Mark Mitchell, ‘i le Aso To’ona’i ‘e le’o telē se ā’afiaga ‘o polokalame ‘a le Soifua Mālōlōina ma ‘o le tele fo’i ‘o ‘au’aunaga ‘ua māe’a ‘ona toe fa’aola.  ‘O masini ‘a kamupanī va’alele, ‘o ‘au’aunaga ‘o le soifua mālōlōina, ‘o fale’oloa, ‘o fa’asalalauga, faletupe, gāluega tetele ma feoa’iga ma le tele ‘o isi ‘au’aunaga, sā motusia ma ā’afia a lātou masini komipiuta ma feso’ota’iga ‘i le Aso Faraile.

ATA: Sebastien Lapeyrere / AFP (RNZ).