167 māliliu ‘ina ‘ua pa’ū se va’alele Kōrea ‘i Saute

‘E to’a 167 na māliliu ‘ina ‘ua mū se va’alele ‘i le malae va’alele fa’avāomālō ‘i Muan ‘i le Aso Sa ‘i Korea ‘i Saute.  Na fa’aalia ‘i ni ata video le sese’e ‘o le va’alele ‘e aunoa ma pa’u po’o meafaigāluega ‘e fa’aaogā ‘e tūlau’ele’ele ai, ma i’u ai ‘ina pā.  ‘E to’a 181 tagata na iai ‘i le faigāmalaga a le Jeju Air nūmera 7C2216 mai Bangkok. ‘E to’alua le ‘aufaigāluega na fa’asaoina pei ‘ona līpotia ma ‘o se va’alele ‘o le itū’āiga ‘o le 737-800. 

‘O le ‘aufaigāluega ‘e to’alua ia na fa’asaoina mai le vāega pito ‘i tua ‘o le va’alele ‘a’o mumū.  ‘O lo’o sā’ilia tino māliliu ‘o isi tagata ia ‘e le’i maua.  ‘Ae na togafitia ‘i le falema’i tagata ‘e to’alua ia na fa’asaoina.

‘O se fa’alavelave pito mātuiā lea ‘i se kamupanī va’alele ‘i Kōrea ‘i Saute talu mai le fa’alavelave ‘i le 1997 lea na pa’ū ai se va’alele ‘a le Korean Air ‘i Guam ma māliliu ai le silia ma le to’a 200.  ‘O lo’o aofia ‘i le pasese ni tagātā nu’u Thailand se to’alua ‘ae iai le talitonuga ‘o isi ‘uma ‘o tagata Kōrea ‘i Saute.  Na fa’ato’ese le pule sili ‘o le Jeju Air, Kim E-bae ma matuā to’ele ‘i le taimi ‘o se folasaga ‘i luga ‘o le televise.

‘Ua fa’agāsolo su’esu’ega ma ‘o lo’o va’ava’ai ‘i ni manulele ma le tūlaga ‘o le tau.  Na līpotia ‘e le pūlega ‘o le malae va’alele, ‘ātonu ‘o ni manulele na ala ai ‘ona fa’alētonu vāega ‘o le va’alele ‘e mafai ai ‘ona tūlau’ele’ele.

Link to RNZ (Article) translated by Savelina Kasiano: https://www.rnz.co.nz/news/world/537790/179-dead-after-south-korean-airliner-crashes-explodes-in-fireball

ATA: Rescue personnel work near the tail section of a Jeju Air Boeing 737-800 series aircraft after the plane crashed and burst into flames at Muan International Airport. Photo: AFP (RNZ).