Tūlaga lelei tā’a’alo ‘a fānau ‘i le ‘Ā’oga Tā Polo Sāmoa Uēligitone ‘i ta’amilosaga

‘I le Aso Gafua 7 ‘Oketopa sā fa’ataunu’uina ai le tā’aloga tā polo ‘a le Shandon Junior Open 2024 ma sā faia lava ‘i le malae ‘a le Shandon Golf Course. Sā ‘āuai ai Teisa Mania Vaka, Toaiva Faafia ma Janiva Faafia mai le Ā’oga Tā polo Sāmoa Uēligitone, Wellington Samoa Golf Academy.  ‘I le māe’a ai ‘o le ta’amilosaga mō pū ‘e 18 po’o le 18 holes, sā fa’apea ‘ona mau tūlaga ai le tama’ita’i ‘iā Janiva Faafia ‘i le tūlaga 2 ‘i le stableford, toe mālō fo’i Janiva ‘i le nearest to the pin po’o le tā latalata ‘i le fu’a, ‘ae tūlaga tutusa ai Teisa ma Sam, le tama ta’alo mai Boulcott Farm ‘i le tūlaga muamua ‘i le Gross. 

Ma ‘ua manumālō tutusa ai nei Teisa Mania Vaka ma Sam Lang ‘i le ipu po’o le trophy ‘a le Shandon Junior Open 2024.

Sā toe tā’a’alo foi Teisa, Toaiva ma Janiva ‘i le Manor Park Junior Open 2024 sā fa’ataunu’uina ‘i le Aso Faraile 11 ‘Oketopa. 

Māe’a ai ‘o le tā’aloga, tūla’i mai ai:  

1.  Toaiva Faafia ‘i le Gross Division
2.  Teisa Mania Vaka ‘i le Gross Division  

Tūlaga muamua Janiva Faafia ‘i le Stableford Division. 

‘I le Aso Sā 13 ‘Oketopa sā fa’ataunu’uina ai le tā’aloga ‘a le Wellington Matchplay 2024 Championship, sā faia ‘i le malae ‘a le Wainuiomata Golf Course.  Na tauvā ai Teisa ma Toaiva mai le Wellington Samoa Golf Academy. 

‘I le māe’a ai ‘o le tauvaga, na manumālō ai Teisa ‘i lana paga ‘i le semifinal po’o le to’afā pito ‘i luga, toe manumālō ‘i lana final po’o le su’ega ‘o le siamupini ‘i le vāega sā tauvā ai.  ‘Ua ‘avea nei Teisa Mania Vaka ma siamupini ‘o le Wellington Matchplay 2024 ‘i le vāega ‘o tama’ita’i po’o le Women’s Division.  

‘Ua sāuni atu nei Teisa ma Toaiva ‘e tā’a’alo ‘i le ‘au fili ‘a Uēligitone ‘i le ‘au ‘a tama’ita’i po’o le Women’s Team ‘i le fa’aiuga ‘o le vāiaso nei ‘i le Te Ngutu Golf Course ‘i Taranaki.  ‘O le tauvaga lea ‘i le vā ‘o Uēligitone, Taranaki, Hawkes Bay ma Manawatu/Wanganui. 

ATA: Sāmoa Capital Radio