Tōfia le ali’i ‘o Theodore McFarland ma Kapeteni ‘a le Manu Sāmoa

‘Ua tōfia le ali’i ‘o Theodore McFarland ma Kapeteni filifilia ‘a le Manu Sāmoa. ‘O le aoāuli ‘o le Aso Gafua na feiloa’i atu ai le vasega ‘o tusitala ma le Afioga ‘i le Faiā’oga Ulu ia Mase Mahonri Schwalger ma le Kapeteni fou ia McFarland.

Na saunoa Mase, ‘o se tōfiga tāua tele le kapeteni mo le ‘au ‘a le atunu’u, ma ‘ua fētaui lelei ma Theodore. Na ‘amata ta’alo McFarland mo le Manu Sāmoa ‘i le 2021, ma ‘ua lava tapena fo’i mo le tau’aveina ‘o le ‘au.

‘O le susuga ia McFarland na ‘amata ta’alo mai ‘i le lakapī a’o ā’oga ‘i le Kolisi ‘a Pesega Church College, ma na fa’apea fo’i ‘ona ta’alo mo le ‘au ‘a le Moamoa Rugby Club ‘i le 2016.

Na maua fo’i le avanoa ‘o Theodore ‘e ta’alo ai ‘i nisi ‘o kalapu ‘i fafo atu ‘o Sāmoa, ‘e pei ‘ona ‘i ai le ‘au ‘a le Saracens, Dallas Jackals ma nisi.

‘O le ta’aloga muamua ‘o le ‘a ta’ita’ia ai ‘e McFarland le ‘au, ‘o le Aso Faraile nei, 5 ‘o Iulai ‘i le malae ‘a le Apia Park ‘i Sāmoa.