Tatalaina le Ā’oga Si’isi’i U’amea Mamafa ‘o le Oceania Weightlifting Insititute and Academy ‘i Sāmoa

‘Ua tatalaina nei le Ā’oga Si’isi’i U’amea Mamafa, ‘ua fa’aigoaina ‘o le Oceania Weightlifting Institute and Academy ‘i Sāmoa.

‘O le tatala ai ‘o lenei ā’oga, ‘o se matāti’a tāua mō le atunu’u, ‘e lē gata ‘i fanau ‘a le atunu’u, ‘a’o se avanoa mō ‘i latou ‘i le Pasefika, ‘e malaga tafafao atu mō ta’aloga (sports tourism).

‘O lo’o fa’amautū lea ā’oga ‘i le Gym 2 ‘i Tuanai’mato, ma ‘o le Afioga ‘iā Tuaopepe Jerry Wallwork, ‘o le Peresetene ‘o le fa’alāpotopotoga si’isi’i ‘i le atunu’u, ‘o le ‘ā fa’afoeina lea ā’oga.

Na fa’ailoa ‘e Wallwork, ‘o lenei ā’oga ‘o lo’o faʻamoemoe ‘e aʻoaʻoina ai tagata tāʻa’alo mai le Oceania, po’o le Pasefika ‘ina ‘ia ‘ausia pine ‘o le ‘Ōlimipeka ma faʻaogā nofoaga ‘e talimālō ai le ‘au si’isi’i ​​fa’avā’omālō ma faiā’oga, ma ‘o se avanoa ‘e saga tapu’e ai lenei taʻaloga ‘i le atunuʻu ‘ina ‘ia faʻaleleia.

‘E 30 le ‘au si’i mai le Pasefika ‘ua fa’amoemoe ‘e malaga mai ‘i Sāmoa mō le ā’oga.

ATA: Samoa Association of Sports and National Olympic Committee FB