Sāuni Joseph Parker ‘e lu’i Daniel Dubois mo le IBF

‘Ua līpotia ‘e se tusitala mō faipelega ‘i le Iūnaite Setete, Dan Rafael, ‘o le ‘ā lu’iina ‘e Lupesoli’ai Joseph Parker le ali’i ‘Egelani ‘o Daniel Dubois mō le fusi ‘o le IBF ‘i Saudi Arabia ‘i le aso 22 Fepuari.  ‘O le māsina ‘o Sētema na faiā’ina ai Anthony Joshua ‘iā Dubois ma manumālō ai ‘i le fusi ‘o le IBF. 

Sa iai le manatu ‘o le to’atele, ‘o le ‘ā toe lu’i ‘e Joshua le fusi peita’i ‘o lea ‘ua fa’ase’e ‘ese, ma ‘ua maua ai loa le avanoa mō Parker ‘e lu’i ai le isi fusi ‘o fusi ‘e fā ‘o le lalolagi, ‘e le’o ‘ūmiaina ‘e le siamupini ‘o Oleksandr Usyk ‘o Ukraine.  ‘O le fusu’aga mulimuli ‘a Parker, na faia lea ‘i le māsina ‘o Mati, lea na manumālō ai ‘iā Zhilekk Zhang ‘o Saina, ma ia maua ai le fusi ‘o le WBO ‘i le paga mamafa. 

‘O Parker na manumālō ‘i le WBO ‘iā Tēsema 2016, ‘i se fusu’aga vāvālalata ma Andy Ruiz ‘o Mexico ‘i ‘Aukilani.  ‘E fa’alua ‘ona ‘ia puipuiina le fusi ‘i le 2017 peita’i na faiā’ina ‘iā Joshua ‘i le 2018.

Link to RNZ (Article) translated by Savelina Kasiano: https://www.rnz.co.nz/news/sport/534986/joseph-parker-set-to-challenge-daniel-dubois-for-the-ibf-crown-report

ATA: Getty Images / Richard Pelham. (RNZ)