Ofi atu Amie Fisher ma Lisa Carrington ‘i le semifinal ‘o le K1 500m

‘E ataata mai lava le toe tauvā ‘o tama’ita’i Niu Sila ‘e to’alua ‘i le sā’iliga ‘o le ‘auro ma le siliva ‘i le tū’ūga alo va’a ‘o le K1 500mita ‘i Pale ‘i le ‘Ōlimipeka, ‘ina ‘ua tūlaga muamua le taimi ‘o Dame Lisa Carrington ‘ae lona lua atu ‘i ai le taimi ‘o Aimee Fisher. 

‘O le pō ‘o le Aso To’ona’i taimi Niu Sila, ‘e faia ai le semifinals po’o le tauvaga ‘e sa’ili ai ‘i lātou ‘o le ‘ā tauvā ‘i le su’ega ‘o pine ‘o lea tā’aloga.  ‘E 1:48:51 le taimi ‘o Carrington, ‘ae 1:49.16 le taimi ‘o Fisher.  ‘Āfai ‘ae ofi atu ‘uma ‘i lā’ua ‘i le sā’iliga ‘o pine mō lea tū’uga, ‘o le ‘ā ‘avea ma tala fa’asolopito mō tā’aloga ‘i Niu Sila.  ‘O Carrington na pine ‘auro ‘i le ‘Ōlimipeka ‘i Tokyo, ‘ae ‘o isi ta’amilosaga ‘e lua na fa’agāsolo ‘a’o lumana’i le ‘Ōlimipeka ‘i Pale, sa mua ai le tama’ita’i ‘o Fisher.

‘I isi fa’ai’uga ‘o ta’aloga ‘a Niu Sila ‘i le ‘Ōlimipeka; sa manumālō le ‘au vili uila ‘a tama’ita’i Niu Sila (women’s pursuit) ‘i le pine siliva, lea ‘ua pine ‘auro ai ‘Amerika.  ‘Ae na lē manuia le taumafaiga ‘a tama’ita’i ‘uma ‘e to’atolu na ofi atu ‘i le su’ega ‘o pine mo le oso maualuga ‘e fa’aaogā ai le lā’au umi po’o le pole vault.  Na’o le tama’ita’i ‘o Eliza McCartney na sao ‘i le oso ‘e 4.70 mita peita’i ‘e le’i ‘ausia le 4.80 mita.  ‘E to’alima na fa’aauauina le su’ega ‘o pine, ‘e aofia ai ma le tama’ita’i ‘Ausetālia.

Link to RNZ (Article) translated by Savelina Kasiano: https://www.rnz.co.nz/news/olympics-2024/524462/olympics-fisher-and-carrington-top-kayak-sprint-qualifiers

ATA: PhotoSport (RNZ).