Manumālō le Black Caps ‘i le series ‘i le vā ma ‘Initia

‘I kilikiti fa’alevā’omālō, ‘ua soso’o manumālō ‘e lua ‘o le ‘au a ali’i ‘o Niu Sila le Black Caps ‘i tā’aloga faitauina fa’alevā’omālō po’o tests ‘i le vā ma le ‘au mālosi ‘a ‘Initia, ‘a’o iai ‘i lā lātou ta’amilosaga ‘i totonu ‘o lea atunu’u ‘i le taimi nei.

‘O le manumālō lona lua lenei, pei ‘ona silasila ma maimoa ‘i ai ‘i le tv, sā iloga ‘ona lelei ai le tā’a’alo ‘a le ali’i fa’ate’a ‘o Mitchell Santner, lea na ia maua pā ‘e 13 mō le 157 ‘o ‘ai, ma tūla’i mai ai ‘o se tasi lenei ‘o ali’i fa’ate’a ‘ua toatolu ‘i ai fa’ate’a aupito lelei ‘a Niu Sila ‘i le tala fa’asolopito ‘o le tā’aloga.

‘O isi fa’ate’a iloga ‘e to’alua ‘a Niu Sila, ‘o le ali’i ‘o Sir Richard Hadlee, ‘o lana matāti’a ‘e 15 pē mō ‘ai ‘e 123 ‘i se tā’aloga ma ‘Ausetālia ‘i le 1985, ma le ali’i ‘o Ajaz Patel ‘e 14 ana pē na maua mō ‘ai ‘e 225 ‘i se tā’aloga faitauina ‘a Niu Sila ma ‘Initia ‘i le tausaga ‘e 2021.

‘O le soso’o ai lā ‘o mālō ‘e lua ‘o le Black Caps ‘a Niu Sila, ‘a’o iai ‘i lana ta’amilosaga lenei ‘i ‘Initia, ‘ua fa’apea ‘ona manumālō ai ‘i lātou ‘i le series lenei ‘i le vā ma ‘Initia, ‘e ui ‘ina ‘e toe tasi le tā’aloga ‘o lo’o totoe ‘e faia lea ‘i le a’ai ‘o Mumbai.

Link to RNZ (article) translated by Lauano Ilaoa: https://www.rnz.co.nz/news/sport/532078/black-caps-victory-over-india-most-pleasing-mitchell-santner-says

ATA: photosport – Mitchell Santner appeals during New Zealand’s second Test win over India in Pune.