Manumālō Jai Opetaia ‘i le ta’amilosaga 4 ‘i le fusu’aga ma David Nyika

‘I līpoti ‘a Simon Smale mō le ABC na tā’ua ai, ‘ua tūmau pea ‘ona ‘ūmia ‘e Jai Opetaia ‘le siamupini ‘o le fusuaga ‘i le paga ‘o le cruiserweight ‘i le lalolagi ‘ina ‘ua faiā’ina ai David Nyika ‘o Niu Sila ‘i le ta’amilosaga lona 4 ‘i le Gold Coast ‘i le vaveao analeila. 

‘Ua 27 ai fusu’aga ‘a Opetaia ‘i le ta’aloga fa’apolōfesa, ‘e le’i faiā’ina, ma ‘o le isi ana fusu’aga ‘o lumana’i, ‘e ono lu’iina ai le tu’ufa’atasiga ‘o fusi, ‘i se faipelega tele ma le siamupini ‘o le WBO ma le WBA ‘o Gilberto Ramirez ‘o Mexico ‘iā Mē.  Sā fa’ate’ia Opetaia ‘i le ‘āmataga ‘i le mālosi ‘o le osofa’i a Nyika peita’i na mafai ‘e Opetaia ‘ona fa’amuta le fusu’aga ‘i le ta’amilosaga lona 4.  

‘O le faiā’ina muamua lea a le ali’i fusu ‘a Niu Sila ‘i ana fusu’aga fa’apolōfesa ‘e 11.  ‘O le 21 ai lea ‘o fusu’aga ‘ua manumālō ai Opetaia ‘i le tu’i oti.  ‘I le māe’a ai ‘o le fusu’aga, na fa’afetaia ai ‘e Opetaia le ali’i Niu Sila ‘ona ‘o lona taliaina ‘o le fusu’aga ‘i totonu ‘o vaiaso ‘e tolu. 

‘E manatu Eddie Hearn, lea e fa’alauiloaina fusu’aga ‘a Opetaia ‘i Europa, ‘e mafai ‘e Opetaia ‘ona tuufaatasia fusi o le cruiserweight ae lē gata ‘i lea ‘e mafai fo’i ona ia faafaiaina ‘i le siamupini ‘o le WBO, WBA ma le WBC ‘o le paga mamafa lea ‘o lo’o ‘ūmia ‘e Oleksandr Usyk.

‘Ae ‘ua līpotia e ono fesiligia le atamai ‘o Nyika na ia taliaina ai lea fusu’aga ‘i totonu ‘o vāiaso ‘e tolu, peita’i sa ia lē fa’atali ‘i lona taliaina ‘o le faipelēga ma se tasi ‘o ana paga sa lā sipā pei ‘ona līpotia ai ‘e le Leitiō Niu Sila.

Link to RNZ (Article) translated by Savelina Kasiano: https://www.rnz.co.nz/news/sport/538513/jai-opetaia-brutally-knocks-out-david-nyika-to-retain-ibf-and-the-ring-cruiserweight-world-titles

Jai Opetaia vs David Niyka ‘i le Gold Coast Convention. Ata: Chris Hyde.