Manumālō Dame Lydia Ko ‘i le fa’ailoga pito maualuga ‘i le Halberg Awards

Na maua ‘e Dame Lydia Ko, ‘o le ta’aloga tāpolo, le fa’ailoga pito maualuga ‘o lenei tausaga, ‘o le Supreme Halberg Award, ‘o ta’aloga ‘ese’ese ‘i totonu i Niu Sila.  Sā ia mauaina fo’i le fa’ailoga ‘o le teine tā’alo ‘o le tausaga ‘a Niu Sila.                                                                                     

‘O tūlaga maoa’e na ‘ausia ‘e Dame Lydia ‘i le tausaga talu ai, ‘e aofia ai le pine ‘auro ‘i tā’aloga ‘o le ‘Ōlimipeka, siamupini ‘i le tauvaga ‘a tama’ita’i ‘i Peretania (British Open) ma sā fa’aulufale ai fo’i ‘i le saofa’iga ‘a tagata ‘ua iloga ‘i lea fo’i tā’aloga ‘i le lalolagi, le Hall of Fame.

Sā tauvā ai Dame Lydia ma Dame Lisa Carrington ‘o alogāva’a, lea na manumālō ‘i lea fa’ailoga ‘i le tausaga talu ai, fa’atasi ma Ellesse Andrews ‘o le viligā uila, teine ta’alo ‘o le Ipu ‘o le lalolagi ‘o le Kilikiti T20 ‘o Amelia Kerr fa’apea ai ma Errin Routliffe ‘o le tēnisi, ma Emma Twigg ‘o le alova’a. 

‘O le tama ta’alo ‘o le tausaga, na maua ‘e Hamish Kerr ‘o le oso maualuga (high jump), tagata ta’alo ‘o ē ‘e iai mana’oga fa’apitoa ‘o Anna Grimaldi, ‘au ‘o le tausaga na maua ‘e le ‘au alova’a ‘a tama’ita’i, le Women’s K4 Sprint Kayak Crew, fa’iā’oga ‘o le tausaga, Gordon Walker ‘o le ‘au alo va’a, tagata ta’alo ‘ua maoa’e le tūla’i mai ‘o lana tāleni na mauaina lea ‘e Tyler Bindon ‘o le soka.

ATA: Halberg Foundation FB.