Mālō PNG ‘iā Fiti Bati ‘ae vali ‘e tama’ita’i ‘o le Fetū Sāmoa Tonga ‘i lakapī liki ‘a le Pasefika ‘i le fa’ai’uga ‘o le vāiaso

‘I le ta’amilosaga ‘o lakapī liki ‘a le Pasefika, na mālō le ‘au ‘a le Kumuls ‘a Papua Niu Kini, ‘i le ‘au ‘a Fiti ‘i la la tā’aloga sā faia ‘i Suva ‘i le pō ‘o le Aso To’ona’i. ‘O ‘ai ‘o lea tā’aloga ‘e 22 PNG ‘i le 10 ‘a le Fijian Bati. ‘O le mālō ai ‘o PNG ‘iā Fiti, ‘o le ‘ā sauni ai ‘e tā’a’alo ma le ‘au ‘a le Atu Kuki ‘i le lua vāiaso ‘o lumana’i, mā ‘o lea tā’aloga ‘e faia ‘i Port Moresby.‘Ae ‘o le ‘au ‘a Tonga lea na faia’ina ‘iā ‘Ausetālia ‘e 18 ‘i le lēai ‘i le pō ‘o le Aso Faraile, ‘e tatau ‘ona mālō ‘iā Niu Sila ‘i la lā tā’aloga ‘i ‘Aukilani ‘i le Aso 2 ‘o Nōvema, ‘ina ‘ia tūmau ai ‘i le vāega pito ‘i luga ‘o le ta’amilosaga ‘a ali’i.

‘Ae ‘i le vāega ‘o tama’ita’i, na mata’ina le mālō ‘o le Fetū Sāmoa ‘i le ‘au ‘a tama’ita’i mai Tonga, ‘i ‘ai ‘e 30 ‘i le 16, ‘o lea mālō ‘o le Fetū Sāmoa, ‘o le ‘ā sāuni ai mō le final ‘o le ta’amilosaga ‘a le itūpā ‘o tama’ita’i ‘i le Aso 2 ‘o Nōvema. Na fa’aalia mai fo’i le tūlaga lelei ‘o le ‘au lenei ‘a tama’ita’i ‘o Sāmoa mō sona avanoa ‘e tauvā ai ‘i le Ipu ‘a le lalolagi ‘i lakapī liki ‘i le tausaga fou.

Link to RNZ (article) translated by Lauano Ilaoa: https://www.rnz.co.nz/international/pacific-news/531313/rugby-league-kumuls-dominate-bati-as-samoa-humbles-tonga-in-pacific-championships-opener

ATA: Facebook/NRL