Māfua’aga na sāvali ‘ese ai le Lakapī ‘a Niu Sila mai talosaga ‘e fa’asao ai le Moana Pasifika

‘E ui ‘i le fa’anaunauga ‘e fa’asao le Moana Pasifika peita’i, ‘ua lē mafai lava ‘ona ‘o tūlaga tau tupe.  Na tē’ena āloa’ia ‘i le Aso Lulu ‘e Fa’alāpotopotoga ‘o le Lakapī ‘a Niu Sila, ni ofo po’o ni talosaga na tu’uina atu ma le fa’amoemoe ‘e fa’asao ma lāvea’i ai le kalapu ‘a le Moana Pasifika. 

Na fa’aalia ‘e le NZR ‘e ui ‘i ni ofo ‘a ni fa’alāpotopotoga na fofola atu peita’i, ‘e lēai se ofo ‘e mafai ‘ona ‘ausia tu’utu’uga ‘o se tupe mo’omia mō le fa’agaioiga ‘o le kalapu ‘i se taimi ‘umi.  Na saunoa le pule sili ‘o le Lakapī ‘a Niu Sila, Chris Kinraid, ‘e faigatā tele le fa’ai’uga ‘ona ‘o le tāua ‘o le ‘au ‘i le lakapī ‘a le Pasifika peita’i, ‘e fua lava ‘i le fa’anaunauga ‘autū ‘o le tupe fa’avae ‘e tatau ‘ona mausalī ma le taimi ‘e tatau ‘ona fa’atūlaga mai ai lea vaegātupe ‘ina ‘ia mafai ‘ona gāioi ai le ‘au mō lea tausaga.

Na iai ma le ta’ita’i ‘o le NZ First Vaovasamanaia Winston Peters ‘i le fa’apotopotoga ‘o tagata sā taumafai ‘e fa’asao le kalapu, ‘i lona tōfiga ‘o le Minisitā ‘o le Vā ‘i Fafo.  Sā fesoasoani ‘e fa’atautaia fa’atalanoaga ma mālō ‘o le Pasefika fa’apea fo’i ma ni fa’alāpotopotoga ‘e ono mafai ‘ona lagolago ‘i le kalapu.  Na saunoa Kinraid, ‘e ui ‘i lea fa’ai’uga pei ‘ona tē’enaina ai talosaga na tu’uina atu ‘e fa’asaoina ai le kalapu, peita’i ‘e le’i tāpunia le faitoto’a ‘i le lumana’i ‘o se ‘au ‘a le Pasifika. 

‘E silia ma le $8 miliona se ‘aitālafu ‘a le Moana Pasifika ‘e aofia ai le $2.7 miliona ‘o se nonōgātupe mai le Sport NZ ‘e tusa ai ma rīpoti muamua mai le vāega ‘o lo’o fa’atautaia le kalapu ma sa’ili tupe ‘e totogi ai ‘aitālafu.

Link to RNZ (Article): https://www.rnz.co.nz/news/sport/619371/we-ve-not-seen-the-capital-why-nz-rugby-walked-away-from-moana-rescue-bids

IMAGE/ATA: Moana Pasikfika Facebook