Lē manuia taumafaiga ‘a Lulu Sun

Na faia’ina le tama’ita’i Niu Sila ‘o Lulu Sun ‘i le ta’aloga ‘o le to’avalu pito ‘i luga po’o le quarterfinals ‘i le tama’ita’i Croatia, Donna Vekic, lona 37 ‘i le lalolagi, ‘i le ta’amilosaga tēnisi ‘a Peretānia, ‘i Wimbledon.  ‘E 5-7, 6-4, ma le 6-1.  ‘O le taimi muamua fo’i lea ‘ua au atu ai Vekic ‘i se to’afā pito ‘i luga ‘o se ta’amilosaga tele ‘o le tēnisi. 

‘E 23 tausaga ‘o Sun, ‘o le tama’ita’i muamua a Niu Sila ‘ua o’o atu ‘i lea tulaga, ‘i lea tauvaga ‘a Peretania.  ‘O le māsina ‘o Mati na fa’ato’ā liliu mai ai Sun ‘e ta’alo mō Niu Sila, le atunu’u na fānau ai, ‘ae sā ta’alo muamua mō Suitiselani, lea na aumau ai ma lona ‘āiga.  ‘O lona tinā ‘o le Saina, ‘a’o lona tamā ‘o le Croatia. 

‘Ā māe’a le ta’amilosaga i Wimbledon, ‘o le ‘ā tula’i mai lona tūlaga ‘i le lalolagi ‘i le vā ‘o le 55 ma le 42, mā ‘o le ‘ā ofi sa’o atu lava ‘i ta’amilosaga tetele nei ‘o le tenisi po’o grand slams.  Sā fa’au’u Sun mai le Iunivesitē ‘o Texas ‘i le 2022, mā ‘e iloa tautala ‘i le Gagana Saina, Falani ma le Fa’aperetānia.  ‘O lo’o ‘a’o’a’o fo’i lana fa’akōrea.  ‘E $277,000 le aofa’iga ‘o ana tupe na maua ‘i ona fa’ailoga ‘i tā’aloga tēnisi ‘i lona ōlaga ‘ātoa ‘e o’o mai ‘i le vaiaso talu ai.  ‘Ae ‘o lona ofi atu ‘i le to’avalu pito ‘i luga ‘i Wimbledon, ‘ua mautinoa ai lona mauaina ‘o le $782,000 Niu Sila mai lea ta’amilosaga ‘e tasi.  

PHOTO: Lulu Sun / 1 News.