Lē manuia taumafaiga ‘a le Black Ferns ‘iā ‘Egelani

‘Ua lē manuia le taumafai ‘o le ‘au lakapī ‘a tama’ita’i ‘o Niu Sila, le Black Ferns ‘i le ta’amilosaga fa’alevā’omālō ‘o lo’o fa’agāsolo ‘i Kānata mō le siamupini ‘o ‘au ta’i to’a 15 ‘a le lalolagi, le World XV ‘i le ‘itūpā ‘a tama’ita’i.

‘O le ta’aloga ‘a le Black Ferns ‘i le Aso Gafua, na faiā’ina ai ‘i le ‘au mālosi ‘a ‘Egelani, ‘i ‘ai ‘e 49 ‘i le 31.

‘O le tūlaga ‘ua iai le Black Ferns, ‘ua lua o latou faiā’ina ma ‘ua muta ai ma le avanoa ‘e ono siamupini ai ‘i lea ta’amilosaga.

‘E toe tasi le latou ta’aloga ‘o lo’o totoe, ‘o le ‘a fetaui ai ma falani ‘i le ‘a’ai ‘o Vancouver ‘i le Aso Sā ‘a sau nei.